मनाङमा कात्तिक १७ गते प्रदेशसभा उपनिर्वाचन हुने

मनाङ, २० भदौ । हिमाली जिल्ला मनाङमा प्रदेशसभा सदस्य पदका लागि उपनिर्वाचन कात्तिक १७ गते हुने भएको छ।

निर्वाचन आयोगको बिहीबार बसेको बैठकले प्रतिनिधिसभा निर्वाचन क्षेत्र नं. १ अन्तर्गत प्रदेशसभा निर्वाचन क्षेत्र नं. २ को रिक्त स्थान पूर्ति गर्न उपनिर्वाचनको तालिका तय गरी जिल्ला निर्वाचन कार्यालयलाई पत्र पठाएको हो।

निमित्त निर्वाचन प्रमुख अधिकृत गोविन्दप्रसाद अर्यालका अनुसार २०७९ मंसिर ४ गतेको प्रदेशसभा निर्वाचनमा निर्वाचित राजीव गुरुङ (दीपक मनाङे) अयोग्य ठहरिएपछि रिक्त पदमा उपनिर्वाचन गर्नुपर्ने संवैधानिक व्यवस्था अनुसार कात्तिक १७ गते मतदान हुने तय गरिएको हो।

निर्वाचन आयोगले देशभर अद्यावधिक भएको अन्तिम मतदाता नामावली आगामी भदौ २५ मा प्रकाशन गर्ने र त्यही नामावली यस उपनिर्वाचनमा समेत प्रयोग गरिने जानकारी दिएको छ। साथै, कात्तिक १६ सम्म १८ वर्ष पुगेका नागरिकलाई मतदाताको रुपमा मान्यता दिइनेछ।

गत निर्वाचनमा जिल्लामा कुल ६ हजार ७७९ मतदाता रहेका थिए। तीमध्ये ४ हजार ८४५ जनाले मतदान गरेका थिए, जुन ७१.४७ प्रतिशत हो।