- १ जेष्ठ २०८३, शुक्रबार / May 15, 2026
काठमाडौं, ७ कार्तिक । नेकपा माओवादी केन्द्र र नेकपा एकीकृत समाजवादी (नेकपा एस) बीच पार्टी एकीकरणको प्रक्रिया अब लगभग पूरा भएको छ । यस एकतामा नेत्रविक्रम चन्द विप्लवको नेतृत्वमा रहेको नेकपा पनि समेटिने प्रयास जारी रहेको छ ।
यस सम्बन्धी वार्तामा संलग्न नेताहरूका अनुसार, अब माओवादी केन्द्र र नेकपा एसबीच पार्टी एकीकरणमा कुनै पनि प्रमुख असहमतिहरू छैनन् । पार्टीको नेतृत्वको विषयमा प्रचण्ड र माधवकुमार नेपाललाई जिम्मेवारी दिइएको छ । वार्ता टोलीका एक सदस्यले बताए अनुसार, दुई पार्टीबीच चुनाव चिन्हको बारेमा भने सहमति हुन सकेकाे अवस्था छैन । नेकपा एसले ‘कलम’ चिन्ह राख्न चाहेको छ भने माओवादी केन्द्रले ‘अर्को चिन्ह’ खोज्ने पक्षमा छ ।
पार्टीको सिद्धान्त र नीति कार्यक्रमलाई टुंग्याउनको लागि सहमति भएको छ । नयाँ पार्टीको मार्गदर्शक सिद्धान्त मार्क्सवाद–लेनिनवाद हुने छ भने कार्यनीति नेपाली विशेषतासहितको समाजवाद रहनेछ । माओवादी केन्द्रले माओवाद त्याग्नेछ भने नेकपा एसले जनताको बहुदलीय जनवादको सिद्धान्त पहिल्यै नै त्याग गरेको छ ।
पार्टीको नाममा पनि छलफल जारी छ । पार्टीको नाम “नेपाल कम्युनिस्ट पार्टी समाजवादी” वा “नेकपा समाजवादी” राखिने संभावना छ । साथै, ‘नेकपा समाजवादी केन्द्र’ नामको विकल्प पनि छलफलमा आएको थियो, तर छोटकरी नाम ‘नेकपा सके’ (NCP-SK) अस्वीकृत गरिएको छ ।
नेतृत्वको विषयमा भने प्रचण्ड संयोजक र माधव नेपाल सहसंयोजक हुने प्रस्ताव अघि सारिएको छ । विप्लवसहित अन्य घटकहरूसँगको एकता पछि अध्यक्ष मण्डलको गठनको बारेमा पनि छलफल भइरहेको छ । अब पार्टी एकीकरणका सबै प्रक्रिया अन्तिम चरणमा पुगिसकेका छन् र प्रचण्ड र माधवकुमार नेपालको नेतृत्वमा नयाँ पार्टीको निर्माण हुने सम्भावना रहेकाे छलफलमा सहभागी नेताहरूले बताइरहेका छन् ।
