- २८ असार २०८३, आईतवार / Jul 12, 2026
इस्लामाबाद, ७ कार्तिक । इस्लामाबादका प्रहरी सुपरिटेन्डेन्ट (एसपी) आदिल अकबरको उनको कारभित्रै गोली लागेर मृत्यु भएको इस्लामाबाद प्रहरीका प्रवक्ताले पुष्टि गरेका छन्।
प्रवक्ताका अनुसार, एसपी अकबर कन्स्टिट्युसन एभिन्यूबाट कार्यालयतर्फ जाँदै गर्दा कारभित्रै गोली लागेर मृत्यु भएको हो। हाल यस घटनाबारे थप अनुसन्धान भइरहेको प्रहरीले जनाएको छ।
इस्लामाबादका प्रहरी महानिरीक्षक (आईजी) अली नासिर रिजवीका अनुसार, यो घटना साँझ करिब ४:३० बजे कन्स्टिट्युसन एभिन्यूमा भएको हो। उनले भने, “घटनाको सीसीटीभी फुटेजमा कुनै पनि स्पष्ट विवरण खुलेको छैन, र गोली चल्ने घटना कारभित्र नै भएको पुष्टि भएको छ।”
आईजी रिजवीले थप जानकारी दिँदै भने, “एसपी अकबरसँग रहेको मोबाइल फोन ‘लक गरिएको’ अवस्थामा फेला परेको छ, जसको फोरेन्सिक परीक्षणका लागि तयारी भइरहेको छ।”
प्रहरीले अहिले घटनाको प्रकृति आत्महत्या वा आपराधिक कृत्य हो कि भन्नेबारेमा अनुसन्धान अगाडि बढाइरहेको छ।
