- २ भाद्र २०८३, मंगलवार / Aug 18, 2026
मकवानपुर, २ भदौ । उच्च अदालत जनकपुरको अस्थायी इजलास वीरगन्जमा कार्यरत मुख्य न्यायाधीश गोकर्ण डाँगी र उनको परिवार सवार स्कोर्पियो मकवानपुरमा दुर्घटनामा परेको छ।
प्रहरीका अनुसार मंगलबार बिहान काठमाडौंबाट हेटौँडातर्फ जाँदै गरेको प्रदेश–३–००२ झ ५१८३ नम्बरको स्कोर्पियो भीमफेदी गाउँपालिका–६ स्थित जुराखेतमा दुर्घटनामा परेको हो।
जिल्ला प्रहरी कार्यालय मकवानपुरका सूचना अधिकारी प्रहरी नायब उपरीक्षक माधव काफ्लेका अनुसार दुर्घटनाको समयमा स्कोर्पियोमा उच्च अदालत जनकपुरको अस्थायी इजलास वीरगन्जका मुख्य न्यायाधीश गोकर्ण डाँगीसहित उनका परिवारका सदस्य सवार थिए।
दुर्घटनामा घाइते भएकाहरूलाई तत्काल उपचारका लागि हेटौँडा अस्पताल पठाइएको थियो। तर हेटौँडामा थप उपचार सम्भव नहुने भएपछि घाइतेहरूलाई हेलिकोप्टरमार्फत काठमाडौं पठाउने तयारी भइरहेको मकवानपुरका प्रहरी उपरीक्षक श्यामबाबु खत्रीले जानकारी दिएका छन्।
दुर्घटनामा कति जना घाइते भए भन्ने तथा उनीहरूको अवस्थाबारे प्रहरीले थप विवरण सार्वजनिक गरेको छैन। दुर्घटनाको कारणबारे पनि अनुसन्धान भइरहेको प्रहरीले जनाएको छ।
