- २६ असार २०८३, शुक्रबार / Jul 10, 2026
काठमाडौँ, ४ असाेज । पहिरोका कारण मुग्लिन–नारायणगढ सडक दुईतर्फी बन्द छ। हिजो बेलुका सवा सात बजेतिर चितवनको इच्छाकामना गाउँपालिका–६ स्थित तुइन खोलामा खसेको पहिरोले सडक अवरुद्ध भएको हो। सडक माथिबाट ढुङ्गासहितको पहिरो झर्ने क्रम रोकिएको छैन।
सडक डिभिजन कार्यालय भरतपुर चितवनका अनुसार, पहिरो पन्छाउन उपकरण तयारी अवस्थामा भए पनि सुरक्षाको दृष्टिले तत्काल खटाउन सकिएको छैन। गएराति पनि सुरक्षा जोखिमका कारण काम गर्न नसकिएको जानकारी दिइएको छ। मुग्लिन प्रहरीले सडक खुलाउन चार/पाँच घण्टा लाग्ने अनुमान गरेका छन्।
रातभर सडक अवरुद्ध हुँदा यात्रु बीचबाटोमै अलपत्र परेका छन्। सकेसम्म गाडी र यात्रुलाई वैकल्पिक सडक प्रयोग गर्न आग्रह गरिएको छ। पूर्वबाट आउने साना गाडीहरूले हेटौंडा–कुलेखानी र पश्चिमबाट आउने गाडीहरूले कालिगण्डकी कोरिडोर मार्गको अवस्था हेरेर प्रयोग गर्न सक्ने जानकारी ईन्जिनियर कृष्णप्रसाद आचार्यले दिएका छन्।
