- १९ श्रावण २०८३, मंगलवार / Aug 4, 2026
म्याग्दी, ११ जेठ । म्याग्दीको बेनी नगरपालिका–१० पात्लेखेतस्थित दीपक माध्यमिक विद्यालयका विद्यार्थीलाई वातावरणमैत्री चोयाका सामग्री बनाउने परम्परागत सीप प्रदान गरिएको छ।
विद्यार्थीलाई मौलिक तथा परम्परागत सीप हस्तान्तरण गर्दै वातावरणमैत्री सामग्रीको प्रयोग बढाउने उद्देश्यले डोको, दाम्लो, स्याखु लगायतका सामग्री निर्माणसम्बन्धी तालिम सञ्चालन गरिएको हो।
बेनी नगरपालिकाको ‘हामी सक्छौँ, हामी गर्छौँ’ कार्यक्रमअन्तर्गत कक्षा ९ र १० का २० भन्दा बढी विद्यार्थीलाई तालिम दिइएको दीपक माविका सहायक प्रधानाध्यापक विजय सुवेदीले जानकारी दिए।
तालिममा स्थानीय प्रशिक्षक मनबहादुर परियारले निगालो र बाँसको चोयाबाट डोको, नाङ्लो, डाली, थुन्से, भकारी, नाम्लो र दाम्लो बनाउने सीप सिकाइरहेका छन्। अघिल्लो पुस्ताबाट हस्तान्तरण नहुँदा लोप हुने अवस्थामा पुगेको यो सीपलाई जोगाउन र प्लास्टिकजन्य सामग्रीको प्रयोग घटाउन तालिम सञ्चालन गरिएको विद्यालयले जनाएको छ।
चोयाका सामग्री वातावरणमैत्री हुनुका साथै ढुवानी र भण्डारणमा पनि उपयोगी मानिन्छन्। नगरपालिकाले विद्यार्थीलाई सीप र श्रमसँग जोड्ने उद्देश्यले विभिन्न विद्यालयमा हाउस वायरिङ, प्लम्बिङ, कपाल काट्ने, अतिथि सत्कार, खाना पकाउने लगायतका तालिमसमेत सञ्चालन गर्दै आएको छ।
नगर प्रमुख सुरत केसीका अनुसार यस कार्यक्रमले विद्यार्थीलाई आत्मनिर्भर बनाउन र स्थानीय स्रोतको उपयोगमार्फत रोजगारीका अवसर सिर्जना गर्न सहयोग पुर्याउने अपेक्षा गरिएको छ।
