- २७ जेष्ठ २०८३, बुधबार / Jun 10, 2026
जलेश्वर कारागारबाट भागेका ५७६ मध्ये २५० जना अझै फरार
हालसम्म ३२६ कैदीबन्दी कारागारमा फर्किए
भाग्ने क्रममा ४० भारतीय नागरिक समेत संलग्न
फरार कैदी खोज्न सुरक्षा निकाय परिचालन
कारागारमा भीड, संरचना र औषधि अभावको समस्या
जनकपुरधाम, ११ जेठ । महोत्तरीको जलेश्वर कारागारबाट जेनजी आन्दोलनका क्रममा भागेका कैदीबन्दीमध्ये अझै २५० जना फरार रहेका छन्। आन्दोलनको मौका छोपी कारागार तोडेर भागेका ५७६ कैदीमध्ये हालसम्म ३२६ जना फर्किसकेको कारागार प्रमुख अशोककुमार क्षेत्रीले बताएका छन्।
गत भदौ २४ गते जलेश्वर नगरपालिका–२ स्थित कारागार तोडेर कैदीबन्दी भागेका थिए। भाग्नेमा ४० जना भारतीय नागरिकसमेत रहेका थिए। कारागार प्रशासनले भदौ २५ गते नै सबै फरार कैदीलाई फर्किन आह्वान गरेको थियो। त्यसयता विभिन्न समयमा कैदीहरू स्वेच्छाले फर्किँदै आएका छन्।
हालसम्म ३१६ नेपाली र १० भारतीय नागरिक फर्किसकेको र फर्किने क्रम अझै जारी रहेको कारागार प्रमुख क्षेत्रीले जानकारी दिए।फर्किने कैदीबन्दीलाई कारागार ऐन २०७९ तथा प्रचलित कानुनअनुसार कारबाही गरिनेछ। फरार कैदीलाई लुकाउने वा आश्रय दिने व्यक्तिमाथि पनि कानुनी कारबाही हुने प्रशासनले स्पष्ट पारेको छ।
यसअघि १३ जना कैदी भारतीय प्रहरीले पक्राउ गरी नेपाललाई बुझाएको थियो। वि.सं. १९१३ मा निर्माण भएको पुरानो जलेश्वर कारागारमा हाल २०० जनाको क्षमता भए पनि दोब्बरभन्दा बढी कैदीबन्दी राखिँदै आएको छ। संरचना पुरानो भएकाले व्यवस्थापनमा समस्या भइरहेको छ भने वर्षायाममा डुबानको जोखिमसमेत रहेको जनाइएको छ।
कारागार प्रशासनका अनुसार खानेपानी र खानाको व्यवस्था सामान्य रहे पनि औषधिको अभाव प्रमुख समस्या बनेको छ। बजेट अभावका कारण आवश्यक औषधि समयमै उपलब्ध गराउन कठिनाइ भइरहेको बताइएको छ।
सुरक्षा निकाय परिचालन गरेर फरार कैदीको खोजी कार्य जारी रहेको प्रमुख जिल्ला अधिकारी इन्द्रदेव यादवले बताएका छन्। स्थानीय सरोकारवालाले कारागारलाई सुधार केन्द्रका रूपमा विकास गर्नुपर्ने, नयाँ भवन निर्माण र सीपमूलक कार्यक्रम विस्तार गर्नुपर्ने आवश्यकता औँल्याएका छन्।
