देशका प्रमुख नदीहरू सामान्य अवस्थामा, बाढीको तत्काल खतरा छैन

काठमाडौँ, ११ असार । देशका प्रमुख नदीहरूको बहाव हाल सामान्य अवस्थामा रहेको जल तथा मौसम विभागअन्तर्गत बाढी पूर्वानुमान महाशाखाले जनाएको छ।

बुधबार बिहानको मापनअनुसार कोशी, कर्णाली, नारायणी, महाकाली, कमला, बागमती, पूर्वी राप्ती, पश्चिम राप्ती र बबई नदीको जलप्रवाह सतर्कता तहभन्दा तल रहेको र कुनै पनि नदीमा ठूलो बाढीको सम्भावना हाल नभएको महाशाखाले जानकारी दिएको हो।

महाशाखाका अनुसार हाल देशभर मनसुनी वायुको प्रभाव देखिएको छ। त्यसको प्रभावस्वरूप आज दिउँसो देशभर आंशिकदेखि सामान्य बदली रहने अनुमान गरिएको छ।

विभागले हालकाे अवस्थालाई निरन्तर अनुगमन गरिरहेको छ र आवश्यकता परे थप जानकारी सार्वजनिक गरिने जनाएको छ।