- ६ असार २०८३, शनिबार / Jun 20, 2026
नवलपरासी, २५ जेठ । पूर्वी नवलपरासीको गिरुवारी खोला र अरुणखोला पुलमा ४० टनभन्दा बढी तौल बोकेको सवारी साधन चलाउन निषेध गरिएको छ। सडक डिभिजन कार्यालय भरतपुरले पुलहरूको जिर्ण अवस्था र निर्माणाधीन नयाँ संरचनाका कारण यस्तो निर्णय लिएको हो।
डिभिजन कार्यालयका अनुसार सुरक्षालाई ध्यानमा राख्दै अहिले ती पुलहरूबाट ठूला मालबाहक गाडी-जसमा ट्रक र टिप्पर विशेष गरी पर्दछन् तीनलाइ एकतर्फी रूपमा मात्र सञ्चालनको अनुमति दिइएको छ। एकपटकमा एकतर्फी सवारी मात्र गुडाउन पाउने व्यवस्था गरिएको सूचनामा उल्लेख छ।
केही दिनअघि चोरमारा नजिकैको गिरुवारी खोला पुल भासिएको घटनाले झनै सतर्कता अपनाउन बाध्य बनाएको हो। अहिले प्रयोगमा रहेका दुवै पुल कमजोर अवस्थामा रहेकोले यस्ता संरचनाहरूमा असावधानीपूर्ण प्रयोगले गम्भीर दुर्घटना निम्त्याउन सक्ने जनाइएको छ।
सडक डिभिजन कार्यालयले सवारी चालक, यातायात व्यवसायी तथा सर्वसाधारणलाई अत्यधिक सावधानी अपनाउन अपिल गरेको छ। यसै सन्दर्भमा प्रहरीले पुल वरपर २४ घण्टा निगरानी र सुरक्षा व्यवस्थापन मिलाएको छ। नयाँ पुल निर्माण सम्पन्न नभएसम्मका लागि यी अस्थायी सुरक्षात्मक उपायलाई कडाइका साथ पालना गरिने जनाइएको छ।
