- २५ फाल्गुन २०८२, सोमबार / Mar 9, 2026
काठमाडाैं । काठमाडौँको टोखा नगरपालिका – ९ स्थित नयाँ बसपार्कमा शनिबार फेला परेको शव हत्या गरिएको प्रारम्भिक अनुसन्धानले पुष्टि गरेको छ ।
घटनास्थलमा तन्नाले बेरिएको अवस्थामा भेटिएको शव सुरुमा तेस्रो लिङ्गीको भएको अनुमान गरिए पनि त्रिवि शिक्षण अस्पतालका चिकित्सकले जाँचपछि उक्त शव महिलाको भएको पुष्टी गरेका हुन् । पोस्टमार्टम रिपोर्ट भने अझै सार्वजनिक भएको छैन । प्रहरीले हत्यामा संलग्न आरोपमा उदयपुर घर भएका सूर्य मगरलाई पक्राउ गरेको छ ।
बसपार्कस्थित एक होटलमा भान्सेका रूपमा काम गरिरहेका उनले मृतक महिलालाई ५ सय रुपैयाँ सापटी दिएको र सो रकम फिर्ता नदिँदा विवाद उत्पन्न भएको प्रहरीको प्रारम्भिक निष्कर्ष छ ।अनुसन्धान अधिकारीका अनुसार विवादकै क्रममा सूर्यले महिलाको घाँटी थिचेर हत्या गरेका हुन् । सूर्यले प्रहरीलाई प्रारम्भिक बयान दिँदै मृतक महिलाले आफू रुकुमबाट आएको बताएको बताएका छन् तर उनको वास्तविक पहिचान खुल्न बाँकी छ ।
काठमाडौँका एसएसपी रमेश बस्नेतले मृतकको विवरण पत्ता लगाउन विशेष टोली परिचालन गरिएको जानकारी दिए । उक्त शवलाई त्रिवि शिक्षण अस्पतालमा राखिएको छ । प्रहरीले घटनाबारे विस्तृत विवरण सार्वजनिक गर्न आज पत्रकार सम्मेलनसमेत आयोजना गरेको छ ।
नयाँ बसपार्क क्षेत्रमा पछिल्लो समय आपराधिक गतिविधि बढ्दै गएको भन्दै प्रहरीले सुरक्षामा कडाइ गर्ने जनाएको छ ।
