- १५ जेष्ठ २०८३, शुक्रबार / May 29, 2026
काठमाडौँ, १६ साउन । नेपाल र चीनबीचको औपचारिक कूटनीतिक सम्बन्ध आजदेखि ७० औँ वर्षमा प्रवेश गरेको छ। काठमाडौँ र बेइजिङमा विविध कार्यक्रमहरू आयोजना गर्दै दुई देशबीचको कूटनीतिक सम्बन्ध स्थापनाको ७० औँ वार्षिकोत्सव मनाइँदै छ।
अनौपचारिक रूपमा तिब्बती राजा स्रोङ्चन गम्पोसँग लिच्छविकालीन नेपाली राजकुमारी भृकुटीको विवाहबाट सुरु भएको ऐतिहासिक सम्बन्ध आधुनिक युगमा झन् प्रगाढ बन्दै गएको छ। सन् १९४९ मा चीन जनगणतन्त्र स्थापना भएपछि सन् १९५५ अगष्ट १ मा नेपाल–चीनबीच औपचारिक कूटनीतिक सम्बन्ध स्थापना भएको थियो।
नेपालका लागि चीनका पूर्वराजदूत राजेश्वर आचार्यका अनुसार, पारस्परिक सम्मान, शान्तिपूर्ण सहअस्तित्व, भौगोलिक अखण्डता, सम्प्रभुता र अहस्तक्षेपका सिद्धान्तमा आधारित नेपाल–चीन सम्बन्धलाई दुवै मुलुकले उच्च प्राथमिकता दिँदै आएका छन्। दुवै मुलुकका शीर्ष नेतृत्व यस सम्बन्धलाई अझ सुदृढ बनाउने प्रयासमा क्रियाशील छन्।
चीन राष्ट्रसङ्घीय सुरक्षा परिषद्को स्थायी सदस्यको हैसियतले विश्व राजनीतिमा निर्णायक भूमिका निर्वाह गर्दै आएको छ। चीनले विधिमा आधारित विश्व शासन प्रणाली, अन्तर्राष्ट्रिय शान्ति सुरक्षा तथा साझा भविष्य निर्माणका लागि सहकार्यमा जोड दिँदै आएको छ।
पूर्वराजदूत आचार्य भन्छन्, “विश्वशक्ति राष्ट्र बनेको चीनले हासिल गरेको विकासबाट नेपालले बढीभन्दा बढी लाभ उठाई समृद्धिको दिशामा अघि बढ्नुपर्ने आवश्यकता छ।”
यसैबीच, प्रधानमन्त्री केपी शर्मा ओली आज साँझ नेपालका लागि चीनका राजदूत छेन सङले आयोजना गर्ने स्वागत समारोहमा सहभागी हुने प्रधानमन्त्रीको निजी सचिवालयले जनाएको छ।
