- २६ असार २०८३, शुक्रबार / Jul 10, 2026
काठमाडौं, ६ साउन ।नेपालले आर्थिक वर्ष २०८१/८२ मा कुल १५ खर्ब २७ अर्ब रुपैयाँको वैदेशिक व्यापार घाटा व्यहोरेको छ। भन्सार विभागले सार्वजनिक गरेको तथ्यांक अनुसार यो घाटा अघिल्लो वर्षको तुलनामा करिब ६ प्रतिशतले वृद्धि भएको हो।
पछिल्लो आर्थिक वर्ष २०८०/८१ मा नेपालले १४ खर्ब ४० अर्बको व्यापार घाटा व्यहोरेको थियो। यस वर्षको व्यापार घाटा ८७ अर्बले बढेको छ, जसले देशको निर्यात-आयात असन्तुलनलाई दर्शाउँछ।
नेपालले भारत, चीन लगायतका देशहरूसँग विशेष गरी ठूलो परिमाणमा आयात गर्दै आएको छ। सीमापारको निर्भरता बढ्दै गएपछि सियोदेखि सुनसम्मका सामग्रीहरू विदेशबाट आयात हुँदै आएका छन्। २०८१/८२ मा कुल वैदेशिक व्यापार २० खर्ब ८ अर्ब रुपैयाँ पुगेको थियो। जसमा १८ खर्ब ४ अर्बको आयात भएको छ, जुन अघिल्लो वर्षको तुलनामा १३.२५ प्रतिशतले बढी हो।
तर, निर्यातमा भने उल्लेखनीय वृद्धि देखिएको छ। आर्थिक वर्ष २०८१/८२ मा नेपालले २ खर्ब ७७ अर्बको वस्तु निर्यात गरेको छ, जुन अघिल्लो वर्षको तुलनामा ८१.८० प्रतिशतले बढी हो। अघिल्लो वर्ष निर्यात मात्र १ खर्ब ५२ अर्ब थियो।
यो निर्यात वृद्धिले नेपालका उत्पादक र व्यापारिक क्षेत्रहरूलाई ठूलो उत्साह दिएको छ, यद्यपि व्यापक व्यापार घाटा रोक्न अझ धेरै प्रयास आवश्यक रहेको विश्लेषकहरूले बताएका छन्।
