- ६ असार २०८३, शनिबार / Jun 20, 2026
काठमाडौँ, जेठ २७। यस वर्ष सामान्यभन्दा झन्डै दुई हप्ता अघिनै मनसुन भित्रिए पनि सक्रिय नहुँदा देशभर तीव्र गर्मी महसुस गरिएको छ। पश्चिम नेपालमा तापक्रम ४० डिग्रीभन्दा माथि पुगेको छ भने तराई–मधेसका अधिकांश क्षेत्रमा लू चल्ने स्थिति देखिएको छ।
नेपालगञ्जमा हिजो देशकै सबैभन्दा उच्च तापक्रम ४१ डिग्री सेल्सियस मापन गरिएको छ। धनगढीमा ४०.२ र भैरहवामा ४० डिग्री सेल्सियस तापक्रम पुगेको छ। राजधानी काठमाडौंको तापक्रम पनि ३१.६ डिग्री सेल्सियस पुगेको छ।
पूर्वी नेपालको कोशी प्रदेशमा यद्यपि मनसुन केही दिनअघि भित्रिएको भए पनि सक्रिय नभएकाले वर्षा नहुँदा त्यहाँ पनि गर्मी बढेको छ। मौसमविद्हरूका अनुसार हालसम्म पश्चिम र मध्य नेपालमा मनसुन प्रवेश गर्न सकेको छैन।
मौसम पूर्वानुमान महाशाखाकी वरिष्ठ मौसमविद् शान्ति कँडेलका अनुसार देशभर मनसुन फैलिन अझै एक हप्ता लाग्न सक्ने अनुमान छ। यद्यपि आज कोशी र लुम्बिनी प्रदेश तथा केही पहाडी भेगमा आंशिकदेखि सामान्य बदलीको सम्भावना छ।
कँडेलका अनुसार भोलिबाट पानी पार्ने प्रणाली केही सक्रिय हुने संकेत देखिएको छ, जसले गर्दा गर्मीबाट अलिकति राहत मिल्न सक्छ। गर्मीको असर जनजीवनमा प्रत्यक्ष देखिन थालेको छ।
चिकित्सकहरूले अत्यधिक गर्मीका कारण रिङ्गटा लाग्ने, टाउको दुख्ने, ज्वरो आउने, आँखा पाक्नेजस्ता स्वास्थ्य समस्या हुन सक्ने चेतावनी दिएका छन्।स्वास्थ्यकर्मीहरूले आवश्यक नपरी दिउँसो घरबाहिर ननिस्कन, प्रशस्त पानी पिउन, छाताको प्रयोग गर्न र शीतल स्थानमा बस्न सल्लाह दिएका छन्।
