- २१ भाद्र २०८३, आईतवार / Sep 6, 2026
काठमाडौँ, १३ जेठ । नेपालमा हाल पश्चिमी वायु, स्थानीय वायु तथा पूर्वी भूभाग नजिक रहेको न्यून चापीय क्षेत्रको संयुक्त प्रभाव देखिएको मौसम पूर्वानुमान महाशाखाले जनाएको छ।
यसको असरले देशभर मौसम अस्थिर बनेको छ। गण्डकी, लुम्बिनी, कर्णाली र सुदूरपश्चिम प्रदेशसहित कोशी र बागमती प्रदेशका हिमाली तथा पहाडी क्षेत्रमा सामान्य बदली देखिएको छ भने तराईका धेरै भूभागमा मौसम आंशिक रूपमा सफा रहेको छ। महाशाखाका अनुसार गण्डकी प्रदेशका पहाडी र हिमाली क्षेत्रमा केही स्थानहरूमा तथा लुम्बिनी, कर्णाली र सुदूरपश्चिमका केही हिमाली तथा पहाडी क्षेत्रमा हल्का देखि मध्यम वर्षा भइरहेको छ।
दिउँसोको अवस्था
आज दिउँसो कोशी, मधेस, बागमती र गण्डकी प्रदेशमा सामान्य बदली रहनेछ। बाँकी हिमाली र पहाडी क्षेत्रमा आंशिक बदली रहने अनुमान छ। कोशी, मधेस, बागमती र गण्डकीका हिमाली तथा पहाडी क्षेत्रमा, साथै लुम्बिनीका केही पहाडी भागमा चट्याङसहित मध्यम वर्षाको सम्भावना रहेको महाशाखाले जनाएको छ। कर्णाली र सुदूरपश्चिमका केही स्थानमा पनि वर्षा हुन सक्नेछ।
तराईका केही भागमा तातो दिन रहने सम्भावना छ भने बागमती, गण्डकी, मधेस र कोशी प्रदेशका केही स्थानमा अपराह्नपछि हावाहुरी चल्न सक्ने चेतावनी दिइएको छ।
रातिको अवस्था
राति कोशी, बागमती र गण्डकी प्रदेशमा सामान्य बदली रहनेछ भने मधेस तथा अन्य पहाडी क्षेत्रमा आंशिक बदली रहने अनुमान छ।कोशी, बागमती र गण्डकीका केही स्थानमा तथा मधेस र लुम्बिनीका पहाडी भूभागका एक–दुई स्थानमा चट्याङसहित हल्का वर्षा हुन सक्छ। तराई क्षेत्रमा भने केही स्थानमा मौसम मुख्यतया सफा रहने अपेक्षा गरिएको छ।
