- १३ जेष्ठ २०८३, बुधबार / May 27, 2026
म्याग्दी, १३ जेठ । म्याग्दीको सिरुवारी क्षेत्रमा पहिरो खसेपछि बेनी–जोमसोम–कोरला सडक अवरुद्ध भएको छ। सडक अवरुद्ध हुँदा मुस्ताङ जाने तथा मुस्ताङबाट फर्कने सवारी साधनहरू बीच बाटोमै रोकिएका छन्।
रघुगङ्गा गाउँपालिका–२ माथिल्लो बैसरी (सिरुवारी) क्षेत्रमा पहिरो खस्दा ७६ किलोमिटर लामो बेनी–जोमसोम सडक खण्डमा यातायात पूर्ण रूपमा ठप्प भएको हो।
यस अवरुद्धका कारण स्थानीयबासीसँगै मुस्ताङ भ्रमण तथा मुक्तिनाथ दर्शनका लागि जाने पर्यटक र तीर्थयात्रीहरू प्रभावित भएका छन्। जिल्ला प्रहरी कार्यालय म्याग्दीका प्रहरी निरीक्षक सागर तिमिल्सिनाका अनुसार सडक विभाग र बेनी–जोमसोम–कोरला सडक योजनासँग समन्वय गरेर सडक खुलाउने कामका लागि उपकरण परिचालन गरिएको छ।
उनका अनुसार पानी परेपछि सिरुवारी क्षेत्रमा बारम्बार पहिरो खस्ने समस्या दोहोरिने गरेको छ, जसले यो सडक खण्डलाई जोखिमपूर्ण बनाउँदै आएको छ।
