- ११ जेष्ठ २०८३, सोमबार / May 25, 2026
काठमाडौँ, २ जेठ । संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक प्रतिनिधिसभाको राज्य व्यवस्था तथा सुशासन समितिबाट पारित भएको छ।
विधेयकमा विवादित दुई विषय-अवकाश उमेर ६० वर्ष र कुलिङ पिरियड दुई वर्ष-मा सहमति जुटेपछि विधेयक पारित गरिएको समिति सदस्य सरिता प्रसाईले जानकारी दिइन्।
उनका अनुसार अवकाश उमेर हालकोभन्दा बढाएर ६० वर्ष बनाइनेछ भने उक्त प्रावधान एक/एक वर्ष गरेर क्रमिक रूपमा लागू गरिनेछ। त्यस्तै, कुलिङ पिरियड दुई वर्ष राख्ने निर्णय पनि गरिएको छ।
सरकारको तर्फबाट गृहमन्त्री रमेश लेखकले समितिमा दुवै प्रस्ताव प्रस्तुत गरेका थिए, जसलाई समितिले पारित गरेको हो। विधेयकअनुसार निजामती सेवामा प्रवेश उमेर पुरुषका लागि ३५ वर्ष र महिलाका लागि ३९ वर्ष तोकिएको छ। त्यस्तै, स्थानीय तहमा कार्यरत कर्मचारीले एक पटक अन्तरप्रदेश सरुवा पाउने व्यवस्था पनि विधेयकमा समावेश गरिएको छ।
