सगरमाथा शिखर चुमेर फर्कंदै गर्दा पर्वतारोहीको मृत्यु

काठमाडौँ, ३२ वैशाख । सगरमाथा आरोहण गरेर फर्किने क्रममा एक जना पर्वतारोहीको मृत्यु भएको छ। सोलुखुम्बुका प्रमुख जिल्ला अधिकारी अनोज कुमार घिमिरेका अनुसार, बिहीबार बिहान हिलारी स्टेप नजिक, करिब ८७९० मिटर उचाइमा उक्त घटना भएको हो।

मृतक पर्वतारोहीले सगरमाथाको शिखर चुमिसकेपछि फर्कने क्रममा ज्यान गुमाएका हुन्। यद्यपि मृतकको नाम, राष्ट्रियता र घटनाको विस्तृत विवरण हालसम्म सार्वजनिक गरिएको छैन।

प्रमुख जिल्ला अधिकारी घिमिरेका अनुसार, सगरमाथा क्षेत्रमा उद्धार तथा शव व्यवस्थापनको जिम्मा सम्बन्धित एक्सपिडिसन कम्पनीले लिने भएकाले प्रशासनको प्रत्यक्ष संलग्नता सीमित हुन्छ । तर, शव ल्याउने प्रक्रिया सुरु भइसकेको जानकारी आएको उनले बताए।

पर्यटन विभागका सूचना अधिकारी लिलाधर अवस्थीले पनि घटनाको पुष्टि गर्दै थप विवरण संकलन भइरहेको जानकारी दिए। यो मृत्यु सगरमाथा क्षेत्रमा यो वसन्त आरोहण सिजनको पहिलो मृत्यु हो।

सगरमाथाको नेपालतर्फको मार्ग प्राविधिक रूपमा तुलनात्मक रूपमा सुरक्षित मानिए पनि, आधार शिविरदेखि माथिको ७ हजार मिटर क्षेत्र निकै जोखिमपूर्ण मानिन्छ।