- २२ कार्तिक २०८३, आईतवार / Nov 8, 2026
दैलेख । पेट्रोलियम अन्वेषण उपकरण बोकेको ट्रक दुर्घटनामा परेको छ । दुल्लु नगरपालिका वडा नं. ३ पालीमा दुर्घटनामा परेको प्रमुख जिल्ला अधिकारी खिमराज भुसालले बताए । नेपालगञ्जबाट भैरवी गाउँपालिकाको जलजलेस्थित आयोजनास्थलमा ढुवानी गर्ने क्रममा मप ०३००१ ख ७८१७ नम्बरको भारतीय ट्रक दुर्घटनामा परेको हो ।
प्रमुख जिल्ला अधिकारी भुसालले कैलाश खबरलाई भने, “सडकमा छाडेका गिट्टीका कारण ट्रक सडकमै पल्टिएको हो । अहिले दुईवटा क्रेनको सहायताले ट्रक उठाइसकेको छ ।” चीन सरकारको अनुदानमा सञ्चालित पेट्रोलियम अन्वेषण परियोजनाको पहिलो चरणमा २२ वटा मालबाहक ट्रक अन्वेषणस्थल पुगिसकेका छन् ।
नेपाल र चीन सरकारबीच पेट्रोलियम पदार्थ अन्वेषण तथा उत्खननमा सहकार्य गर्न विसं २०७२ चैत्रमा सहमति भएको थियो । सहमती अनुसार २०७५ साल माघ महिना चीन र नेपालबीच परियोजना स्वीकृत भई २०७६ सालदेखि प्रारम्भिक सर्वेक्षण सुरु भएको थियो । हाल जलजले क्षेत्रमा ४५ रोपनी जग्गा अधिग्रण गरी ड्रिलिङको कार्य भइरहेको छ ।
