लगनखेलको श्रीराम फार्मेसीका सञ्चालक पक्राउ

काठमाडौं । औषधि अपचलनको कसुरमा प्रहरीले ललितपुरको लगनखेलमा रहेको श्रीराम फार्मेसीका सञ्चालक लक्ष्मण महर्जनलाई पक्राउ गरेको छ । मंगलबार पक्राउ परेका महर्जनलाई अनुसन्धानका निम्ति बुधबार अदालतबाट म्याद थप गरी प्रहरी परिसर ललितपुरमा राखिएको छ ।

औषधि व्यवस्था विभाग र प्रहरीको टोलीले अनुगमन गर्दा उनको फार्मेसीमा बिल नभएको २३० थान औषधि फेला परेको थियो । श्रीराम फार्मेसी मंगलबार नै सिल गरिएको छ । महर्जनविरुद्ध थप अनुसन्धान अघि बढाइएको परिसरका एसपी नरेश सुवेदीले जानकारी दिए ।