- २२ श्रावण २०८३, शुक्रबार / Aug 7, 2026
काठमाडौं, २३ मंसिर । प्रधानमन्त्री सुशीला कार्कीले भ्रष्टाचारविरुद्ध सरकार कुनै पनि हालतमा पछि नहट्ने बताउँदै आवश्यक परे जुनसुकै हदसम्म कठोर उपाय अपनाउने स्पष्ट चेतावनी दिएकी छिन्।
भ्रष्टाचारविरुद्धको अन्तर्राष्ट्रिय दिवसका अवसरमा सिंहदरबारमा आयोजित कार्यक्रममा सम्बोधन गर्दै प्रधानमन्त्री कार्कीले सुशासनको अभियानलाई रोक्न खोज्ने, धम्की दिने वा व्यवधान पुर्याउने तत्त्वहरू सफल नहुनेमा जोड दिइन्।
उनले भनिन्, “जेनजी आन्दोलनका अपेक्षा र मागअनुसारका उपलब्धि हासिल हुन केही समय लागलान्। तर भ्रष्टाचारविरुद्ध राज्यका संयन्त्रहरू सक्रिय छन्, सरकार पछि हट्ने छैन। धम्की–दबाबबाट हामी अडिग छौँ।”
प्रधानमन्त्रीले सम्बन्धित निकायका पदाधिकारी तथा राष्ट्रसेवकलाई बिचलित नहुन, व्यावसायिक स्वतन्त्रता र कानूनी हैसियतप्रति पूर्ण भरोसा राखी निर्भीक रूपमा अघि बढ्न पनि आग्रह गरिन्।
उनका अनुसार यो सरकार चुनावी सरकार मात्र नभई जनआवाज र सुशासनका मागबाट उठेको जेनजी आन्दोलनको जगमा बनेकाले भ्रष्टाचार उन्मूलनलाई प्राथमिकताको रुपमा अघि बढाइने बताइन्।
