- २२ श्रावण २०८३, शुक्रबार / Aug 7, 2026
एजेन्सी। जापानको उत्तर–पूर्वी तटीय क्षेत्रमा सोमबार राति गएको ७.६ म्याग्निच्यूडको शक्तिशाली भूकम्पपछि अधिकतम ३ मिटर उचाइको सुनामी आउन सक्ने भन्दै उच्च सतर्कता जारी गरिएको छ।
जापान मौसम विज्ञान एजेन्सीका अनुसार भूकम्प राति ११:१५ बजे गएको हो। भूकम्पको केन्द्र आओमोरी प्रिफेक्चरको तटदेखि करिब ८० किलोमिटर टाढा र ५० किलोमिटर गहिराइमा रहेको अन्तर्राष्ट्रिय सञ्चारमाध्यम रोयटर्सले जनाएको छ।
धक्का अत्यन्त शक्तिशाली भएकाले जापानको उत्तर र पूर्वका कैयौँ क्षेत्रहरूमा स्पष्ट रूपमा कम्पन महसुस गरिएको थियो।
जापानी सार्वजनिक प्रसारक एनएचके का अनुसार होक्काइडो, आओमोरी र इवाते प्रिफेक्चरमा सुनामी चेतावनी जारी गरिएको छ। त्यस्तै मियागी तथा फुकुशिमा क्षेत्रमा सुनामी परामर्श जारी गर्दै तटीय क्षेत्रका बासिन्दालाई समुद्रकिनाराबाट टाढा रहन र उच्च स्थानतर्फ सारिन आग्रह गरिएको छ।
जापान भौगोलिक रूपमा भूकम्पीय जोखिमको उच्च क्षेत्र भएकाले त्यहाँ यस्ता शक्तिशाली भूकम्प सामान्य मानिन्छ। सम्भावित क्षति न्यूनीकरणका लागि अधिकारीहरूले तत्कालै राहत–उद्धार संयन्त्र उच्च सतर्कतामा राखेका छन्।
