- ३१ आश्विन २०८३, शनिबार / Oct 17, 2026
पोखरा । घर निर्माण सम्पन्नको प्रमाणपत्र दिने क्रममा पोखरा महानगरपालिका इन्जिनियरले घुस लिएको प्रकरणमा थप एक जना इन्जिनियर पक्राउ परेका छन् ।
घरनक्सा शाखाका इन्जिनियर शिवराज बराल घुससहित अख्तियार दुरुपयोग अनुसन्धान आयोग पोखराको टोलीले मंगलबार पक्राउ गरेको हो । गत चैत २८ गते घर निर्माणको घर नक्सा प्रमाणपत्र दिने क्रममा सब इन्जिनियर उषाकिरण रोकाया र गोदार इन्जिनियरिङ कन्सल्टेन्सी सेवाका सुरज कुँवरलाई घुससहित पक्राउ गरेको थियो ।
उनीहरु १ लाख ५० हजार रुपैयाँ घुससहित रंगेहात पक्राउ परेका थिए । मंगलबार साँझ बराल रंगेहात पक्राउ गरी अख्तियारको केन्द्रीय कार्यालय टंगाल पठाइएको छ । उनीहरुले एउटै काममा पनि पटक पटक घुस लिएको खुलेको सूचना अधिकारी जगदिश शिवाकोटीले बताए ।
चैत २८ गते सवइन्जिनियर रोकायालाई पोखरा ५, मालेपाटनबाट र गोदार इन्जिनियरिङ कन्सल्टेन्सी सेवाका सुरजलाई पोखरा–४ सेल्वेजबाट पक्राउ गरेको हो । घुससहित पक्राउ परेकी सबइन्जिनियर रोकायालाई महानगरले निलम्बन गरेको छ ।
गोदार इन्जिनियरिङ कन्सल्टेन्सी पोखरा महानगरमै लामो समयदेखि कार्यरत इन्जिनियर महेन्द्र गोदारले सञ्चालन गरेका हुन् । सोही कन्सल्टेन्सीमा कार्यरत कर्मचारी घुस प्रकरणमा समातिएका हुन् ।
पोखरा महानगरपालिका १० का एक सेवाग्राहीको घर निर्माण सम्पन्न गराउने भन्दै घुस लिएपछि उनीहरुले कानुनी उपचारको बाटो रोजेपछि घटना सतहिमा आएको हो ।
