- २९ श्रावण २०८३, शुक्रबार / Aug 14, 2026
काठमाडौँ । प्रतिनिधिसभा विघटनसँगै संसदमा विचाराधीन रहेका ३० वटा विधेयक स्वतः निष्क्रिय भएका छन्। प्रतिनिधिसभामा उत्पत्ति भएका तथा पारित प्रक्रिया पूरा नभएका विधेयकहरू संविधानको व्यवस्था अनुसार अब निष्क्रिय ठहरिएका हुन्।
निजामती सेवा, नेपाल प्रहरी, सशस्त्र प्रहरी, शिक्षा, भूमि, मिडिया काउन्सिल, सूचना प्रविधि तथा साइबर सुरक्षा लगायतका विधेयक निष्क्रिय भएका संसद सचिवालयले जनाएको छ।
दुवै सदनले पारित गरिसके पनि राष्ट्रियसभाबाट आएको सन्देशमाथि प्रतिनिधिसभाले निर्णय लिन बाँकी रहेको अवस्थामा निजामती सेवा विधेयक पनि निष्क्रिय भएको छ। अन्य विधेयकहरू पनि यस्तै प्रक्रियागत कारणले निष्क्रिय भएका हुन्।
संसद सचिवालयका अनुसार अब हुने चुनावपछि गठन हुने नयाँ प्रतिनिधिसभाबाट सरकारको नीति, प्राथमिकता र आवश्यकता अनुसार पुनः विधेयक ल्याइनेछ।
