- २९ श्रावण २०८३, शुक्रबार / Aug 14, 2026
काठमाडौँ, २८ साउन । राष्ट्रिय मानव अधिकार आयोगले कारागार व्यवस्थापनमा सुधार गर्न नेपाल सरकारलाई निर्देशन दिएको छ। आयोगले कारागारभित्रको प्रशासनिक कार्य पारदर्शी बनाउन, कैदीबन्दीप्रति मानवीय व्यवहार सुनिश्चित गर्न र सम्पूर्ण कारागारलाई मानव अधिकारमैत्री बनाउन आग्रह गरेको हो।
रूपन्देही, कैलालीसहित देशभरका कारागारमा क्षमता अभिवृद्धि, पर्याप्त जनशक्ति र बजेट व्यवस्था, सुरक्षा व्यवस्थामा सुधार र कैदीबन्दी स्थानान्तरण प्रक्रियामा पारदर्शिता सुनिश्चित गर्न निर्देशन गरिएको छ।
आयोगको अनुगमनमा कैलाली कारागारमा क्षमताभन्दा बढी कैदीबन्दी, पटक–पटक हुने झडप रोक्न पहलको कमी, न्यून सुरक्षा बल, प्रविधियुक्त सुरक्षा व्यवस्थाको अभाव, र पारदर्शिता नहुँदा कैदीबीच भिडन्त हुने समस्या पाइएको छ।
रूपन्देही कारागारको अनुगमनमा पनि क्षमताभन्दा बढी कैदीबन्दी, ज्येष्ठ नागरिक र बिरामीका लागि छुट्टै ठाउँको अभाव, शिक्षाको अभाव, सामाजिक सुरक्षा भत्ता नपाउने समस्या, र आधारभूत आवश्यकता पूरा गर्न बजेटको कमी पाइएको आयोगले जनाएको छ।
