- २९ श्रावण २०८३, शुक्रबार / Aug 14, 2026
काठमाडौं, १७ साउन । राष्ट्रिय स्वतन्त्र पार्टी (रास्वपा) ले आगामी उपनिर्वाचनबाटै विदेशमा रहेका नेपाली नागरिकले मतदान गर्न सक्ने व्यवस्था सुनिश्चित गर्न निर्वाचन आयोगसँग माग गरेको छ । निर्वाचन आयोगद्वारा आयोजित सर्वदलीय छलफलमा रास्वपाका सहमहामन्त्री तथा लुम्बिनी प्रदेश इन्चार्ज विपिन कुमार आचार्यले प्रवासी नेपालीहरूका लागि मतदान प्रणाली सुरु गर्न आग्रह गरेका हुन् ।
उनी भन्छन्, “निर्वाचन हुन अझै तीन महिना बाँकी छ। यो समय एक निर्वाचन क्षेत्रका लागि आवश्यक कानुनी र प्राविधिक प्रणाली तयार पारेर पाइलट प्रोजेक्टका रूपमा विदेशबाट मतदान सुरु गर्न पर्याप्त हो ।” रुपन्देही–३ मा कार्तिक १७ गते हुने उपनिर्वाचनलाई अवसरका रूपमा प्रयोग गर्न सकिने भन्दै उनले नोट त चल्ने तर मत नचल्ने विडम्बना अन्त्य गर्न निर्वाचन आयोगलाई आह्वान गरे ।
“एउटा निर्वाचन क्षेत्रमै व्यवस्था गर्न सकिन्न भने आयोगले प्रस्ट भन्नुपर्छ , हामीले २०८९ सालसम्म पनि विदेशबाट मतदानको अधिकार दिने छैनौं,” आचार्यले चुनौतीपूर्ण रूपमा भने ।
