- १२ जेष्ठ २०८३, मंगलवार / May 26, 2026
कैलाली । ९ महिनामा १ अर्ब ७८ करोड ९८ लाख रुपैयाँ राजस्व सङ्कलन भएको छ । आन्तरिक राजस्व कार्यालय धनगढीले चालु आवको ९ महिनामा उक्त राजश्व संकलन गरेको हो ।
कार्यालयको चालु आवका ९ महिनामा २ अर्ब १० करोड ९६ लाख राजस्व सङ्कलनको लक्ष्य रहेकामा लक्ष्यको ८४ दशमलव ८४ प्रतिशत राजस्व सङ्कलन भएको जनाएको छ।
आयकरबाट १ अर्ब १ करोड ६७ लाख, मूल्य अभिवृद्धि करबाट ६२ करोड १० लाख, अन्तःशुल्कबाट १० करोड ५६ लाख, ब्याजवापत ३ करोड ७० लाख, बहाल करबाट ९१ लाख र स्वास्थ्य सेवा करबाट १ लाख राजस्व सङ्कलन भएको आन्तरिक राजस्व कार्यालय धनगढीले जनाएको छ ।
कार्यालयको आव ०७९ र ८० मा ३ अर्ब ३६ करोड रुपैयाँ राजस्व सङ्कलनको वार्षिक लक्ष्य रहेकामा २ अर्ब ५७ करोड ९८ लाख रुपैयाँमात्रै राजस्व सङ्कलन भएको थियो ।
चालु आवमा ३ अर्ब ८ करोड ४१ लाख राजस्व सङ्कलन गर्ने कार्यालयको लक्ष्य रहेकामा ९ महिनामा सङ्कलन भएको राजस्व वार्षिक लक्ष्यको ५७ दशमलव ८० प्रतिशत रहेको कार्यालयले जनाएको छ ।
