स्थिति नियन्त्रणमा आएपछि रुपन्देहीमा निषेधाज्ञा हटाइयो

बुटवल, २७ भाद्र । रुपन्देहीमा केही दिनअघि प्रशासनले लगाएको निषेधाज्ञा र कर्फ्यू आदेश हटेपछि जनजीवन सामान्य बन्दै गएको छ । शुक्रबार बिहान ६ बजेदेखि निषेधाज्ञा र कर्फ्यू हटाइएपछि बजार, यातायात, विद्यालय तथा अन्य सेवा सञ्चालन हुने अपेक्षा गरिएको छ ।

जिल्ला प्रशासन कार्यालय रुपन्देहीका प्रमुख जिल्ला अधिकारी टोकराज पाण्डेका अनुसार पछिल्ला दिनमा सुरक्षा व्यवस्थालाई ध्यानमा राख्दै कडाइ गरिएको थियो ।

तर, अहिले अवस्था नियन्त्रणमा आइसकेको र शान्तिपूर्ण वातावरण कायम भएकाले निषेधाज्ञा हटाइएको हो । उनले आवश्यकता परेमा परिस्थिति अनुसार पुनः कडाइ गर्न सकिने पनि बताए ।