- १२ जेष्ठ २०८३, मंगलवार / May 26, 2026
बाजुरा, ३१ साउन । गएरातिदेखिको अविरल वर्षाका कारण साँफे – मार्तडी राजमार्ग पूर्ण रूपमा अवरुद्ध भएको छ । जिल्ला सदरमुकाम मार्तडी जोड्ने यो मुख्य राजमार्ग बडीमालिका नगरपालिका – ४ स्थित रिला खोलामा आएको बाढी र पहिरोका कारण अवरुद्ध बनेको हो ।
जिल्ला प्रहरी कार्यालय बाजुराका प्रहरी निरीक्षक तथा सूचना अधिकारी देवबहादुर चौधरीका अनुसार, रिला गाउँमाथिबाट खसेको पहिरोले खोलामा बाढी आएसँगै सडक पूर्ण अवरुद्ध भएको हो । बाढीको कारणले सडकमा ठूलो क्षति पुगेकाले सवारी आवतजावत पूर्णरूपमा ठप्प भएको छ ।
राजमार्ग खुलाउने प्रयासस्वरूप सडक डिभिजन कार्यालयसँग समन्वय गरी जेसिभी पठाउने काम भइरहेको चौधरीले जानकारी दिए । तर लगातार भइरहेको वर्षाले माथिबाट थप पहिरो खसिरहेकाले बाटो खुलाउन थप चुनौती सिर्जना भएको छ ।
राजमार्ग बन्द हुँदा बाजुरा जिल्लाबाट बाहिर जाने तथा भित्रिने लामो तथा छोटो दुरीका सवारीसाधन चल्न सकेका छैनन् । यसले स्थानीय बासिन्दा, यात्रु र व्यवसायिक आपूर्तिमा समेत प्रत्यक्ष असर पारेको छ ।
