- १५ जेष्ठ २०८३, शुक्रबार / May 29, 2026
काठमाडौँ, १५ जेठ । साफ महिला च्याम्पियनसिप अन्तर्गत समूह ‘बी’ बाट साबिक विजेता बंगलादेश र भारत सेमिफाइनलमा प्रवेश गरेका छन् । लगातार उत्कृष्ट प्रदर्शन गर्दै बंगलादेशले अन्तिम चारमा आफ्नो स्थान सुरक्षित गरेको हो ।
हिजो सम्पन्न खेलमा बंगलादेशले मालदिभ्सलाई ४–२ गोलअन्तरले पराजित गर्दै लगातार दोस्रो जीत दर्ता गर्यो । यस नतिजासँगै बंगलादेश समूह चरणबाट सेमिफाइनलमा पुग्ने टोली बनेको छ । भारतले पनि उत्कृष्ट प्रदर्शन गर्दै अन्तिम चारमा स्थान बनाएको छ ।
यता, लगातार दोस्रो हार बेहोरेपछि मालदिभ्स प्रतियोगिताबाट बाहिरिने पहिलो टोली बनेको छ । समूह ‘बी’ मा बंगलादेश र भारतको दबाबपूर्ण प्रदर्शन देखिएको छ ।
समूह ‘ए’ मा नेपाल, भुटान र श्रीलङ्का प्रतिस्पर्धामा रहेका छन् । पहिलो खेलमा नेपालसँग १–० ले पराजित भएको भुटानले दोस्रो खेलमा शानदार पुनरागमन गर्दै श्रीलङ्कालाई ४–० ले हराएको छ । यस जितसँगै भुटानले सेमिफाइनल पुग्ने आशा जीवित राखेको छ ।
अब नेपालले समूह चरणको अन्तिम खेल आइतबार श्रीलङ्काविरुद्ध खेल्नेछ । उक्त खेलमा बराबरी गरे पनि नेपाल सेमिफाइनलमा पुग्नेछ भने जीत हासिल गरे नेपाल समूह विजेताका रूपमा अगाडि बढ्नेछ । नेपाली टोली अहिले समर्थकको ठूलो अपेक्षासहित उपाधि यात्रामा अघि बढिरहेको छ ।
