- ३० श्रावण २०८३, शनिबार / Aug 15, 2026
काठमाडौं, ८ असोज । बडादशैंलाई लक्षित गर्दै साझा यातायात सहकारी संस्थाले काठमाडौं–नारायणगढ–काठमाडौं बस सेवा सुरु गरेको छ ।
असोज ७ गतेदेखि असोज २० गते कोजाग्रत पूर्णिमासम्म सञ्चालन हुने यस सेवाअन्तर्गत काठमाडौंबाट चितवनको नारायणगढ र त्यहाँबाट पुनः काठमाडौं फर्किने व्यवस्था गरिएको छ । काठमाडौं–नारायणगढसम्मको एकतर्फी भाडा ३०० रुपैयाँ तोकिएको साझा यातायातले जनाएको छ ।
बसहरू ललितपुरको पुल्चोकबाट प्रस्थान गरी लगनखेल, सातदोबाटो, कोटेश्वर, गौशाला, चक्रपथ, गोंगबु नयाँबसपार्क हुँदै कलंकी पुगेर नारायणगढतर्फ जाने छन् । कलंकीबाट साझा यातायातको पहिलो बस बिहान ७ बजे नारायणगढ प्रस्थान गर्नेछ भने त्यसपछि ८, ९, १०, ११ र १२ बजे पनि बस छुट्नेछ ।
नारायणगढ पुगेपछि ती बस यात्रु लिई नारायणगढ बसपार्कबाट पुल्चोक हुँदै काठमाडौं फर्किनेछन् । यात्रुहरूको सुरक्षालाई मध्यनजर गर्दै बसमा टिकट अनिवार्य गरिएको छ । साथै यात्रुलाई सिट बाहेक उभिएर वा मुढामा राखेर यात्रा नगराइने व्यवस्था गरिएको साझा यातायात सहकारी संस्थाले जनाएको छ ।
