- २३ बैशाख २०८३, बुधबार / May 6, 2026
काठमाडौँ, ८ असोज । चितवनको तुइन खोलामा मंगलबार बेलुकी सुख्खा पहिरो खसेपछि मुग्लिन–नारायणगढ सडक पूर्णरूपमा अवरुद्ध भएको छ ।
बुधबार बिहानदेखि पहिरो पन्छाउने प्रयास सुरु भए पनि निरन्तर ढुङ्गा खसिरहेकाले आजै सडक खुल्ने सम्भावना न्यून रहेको सडक डिभिजन भरतपुरका सूचना अधिकारी कृष्णप्रसाद आचार्यले जनाएका छन् ।
सडक अवरुद्ध हुँदा यातायात ठप्प बनेपछि जिल्ला प्रशासन कार्यालय चितवनले यात्रुलाई वैकल्पिक मार्ग प्रयोग गर्न आग्रह गरेको छ । वैकल्पिक मार्गका रूपमा महोत्तरीको बर्दिवास, मकवानपुरको हेटौंडा, रूपन्देहीको बुटवल, नवलपरासी बर्दघाट सुस्ता पूर्वको कावासोती र गैंडाकोट, धादिङको नौबिसे तथा तनहुँको खैरेनीटारबाट यात्रा गर्न सकिने जनाइएको छ ।
मुग्लिन–नारायणगढ सडकखण्डअन्तर्गत तुइन खोलामा पछिल्ला दिनमा बारम्बार पहिरो खस्दा यात्रुहरू दैनिकजसो सास्ती खेपिरहेका छन् ।
सडकमा पहिरो हटाएर केहीबेर यातायात सञ्चालन गरिए पनि फेरि ढुङ्गा खस्दै बाटो अवरुद्ध हुने क्रम दोहोरिएको छ । दशैंको यात्रा नजिकिँदै गर्दा यस्तो अवरोधका कारण यात्रु र सर्वसाधारण थप मारमा परेका छन् ।
