- ३० श्रावण २०८३, शनिबार / Aug 15, 2026
काठमाडौँ । सप्तकोशी नदीमा पानीको बहाव क्रमशः घट्दै गएको छ। पानीको मात्रा कम हुँदै गएपछि कोसी ब्यारेज पुलमा सवारीसाधनको आवागमन पनि पुनः खुला गरिएको सुनसरीका प्रमुख जिल्ला अधिकारी धर्मेन्द्रकुमार मिश्रले जानकारी दिएका छन्।
उनका अनुसार शनिबार सप्तकोशीमा पानीको बहाव पाँच लाख तेइस हजार क्युसेक प्रति सेकेन्डभन्दा बढी पुगेपछि सुरक्षाका कारण कोसी ब्यारेजका सबै ५६ वटै ढोका खोलिएको थियो। तर अहिले पानीको बहाव घट्दै गएपछि तीमध्ये ५३ वटा ढोका मात्रै खुला राखिएका छन्।
सोमबार बिहानको मापन अनुसार सप्तकोशीको बहाव चार लाख दस हजार नौ सय पन्चानब्बे क्युसेकमा झरेको छ। बिहानैदेखि उक्त क्षेत्रमा घाम लागिरहेको र माथिल्लो तटीय क्षेत्रमा पनि वर्षा नपरेकाले नदीको जलस्तर क्रमशः घट्दै गएको प्रमुख जिल्ला अधिकारी मिश्रले बताए।
उनका अनुसार परिस्थिति सामान्य हुँदै गएको र बाढीको जोखिम पनि घटेको छ। स्थानीय प्रशासनले भने अझै सतर्कता अपनाउन आग्रह गरेको छ।
