- १५ जेष्ठ २०८३, शुक्रबार / May 29, 2026
जनकपुरधाम, २० असाेज । सिरहाको कल्याणपुर नगरपालिका–८, अरङमा पाँच दलित परिवारको घर भत्काएको आरोपमा वडाध्यक्ष रामकिशोर यादव पक्राउ परेका छन्।
घटनामा संलग्न भएको आरोपमा पीडितहरूले १३ जनाविरुद्ध आपराधिक उपद्रवअन्तर्गत जाहेरी दिएका थिए। जाहेरी परेपछि प्रहरीले वडाध्यक्ष यादवलाई सोधपुछका लागि बोलाएको र त्यस क्रममा उनलाई नियन्त्रणमा लिई अनुसन्धान सुरु गरिएको सिराहाका प्रहरी उपरीक्षक (एसपी) अनन्तराम शर्माले जानकारी दिएका छन्।
वडाध्यक्ष यादवका साथै तोडफोड र लुटपाटमा संलग्न स्थानीय राजकुमार सिंह, प्रभास सिंह, नितेश सिंह, शैलेन्द्र सिंह, कैलाश सिंह, गणेश कामती र मुस्तफा राइनलगायतमाथि पनि जाहेरी परेको छ। जाहेरी परेपछि वडाध्यक्ष यादवसहित तीनजनालाई पक्राउ गरिएको र बाँकी प्रतिवादीको खोजी कार्य जारी रहेको एसपी शर्माले बताए।
अरङको ठूलो पोखरीको उत्तरपट्टी डिलमा बसोबास गर्दै आएका पाँच दलित परिवारको घर शुक्रबार साँझ करिब पाँच बजेतिर प्रहरीको उपस्थितिमै तोडफोड र लुटपाट गरिएको आरोप लगाइएको छ। स्थानीय शोभित पासवान, विन्दे पासवान, अशोक पासवान, राजकुमार पासवान र रासलाल पासवानका घरमा तोडफोड गरिएको जनाइएको छ।
पीडितका अनुसार राजकुमार सिंह, प्रभाष सिंह, शैलेन्द्र सिंह, नितेश सिंहलगायत करिब २०–२५ जनाको समूहले घर तोडफोड र लुटपाट गरेको थियो। मिर्चैया र सशस्त्र प्रहरीको थप टोली पुग्दा उनीहरू फरार भएका थिए।
असोज १ गते विश्वकर्मा पूजाका दिन अरङ बजारमा आयोजना गरिएको आर्केस्ट्रा कार्यक्रममा दलित समुदायका युवासँग प्रभाष सिंह समूहको विवाद भएको थियो। सो घटनापछि दलित समुदायले प्रहरीमा उजुरी दिएको र त्यसकै प्रतिशोधस्वरूप घर तोडफोड गरिएको स्थानीयहरूको भनाइ छ।
