- २१ भाद्र २०८३, आईतवार / Sep 6, 2026
सप्तरी, २ कार्तिक । सप्तरीको बोदेबर्साइन नगरपालिका–८, काचनस्थित कबिर बाबा मन्दिरका पुजारी रामदुलार साहको आज बिहान हत्या भएको छ। ७७ वर्षीय पुजारी साहलाई अज्ञात समूहले बिहान २ः०० बजे गोली प्रहार गरी हत्या गरेको पुजारीका परिवारका सदस्य रामसुन्दर साहले जानकारी दिएका छन्।
गाउँको पूर्वतर्फ रहेको मन्दिरमा पुजारी साह कुटी बनाएर एक्लै बस्दै आएका थिए। अज्ञात समूहले उनलाई सडकमा निकालेर पिठ्युमा गोली प्रहार गरेको प्रहरी विवरणमा उल्लेख छ। घटना भएको केही मिनेटमै स्थानीयले काचनलीस्थित प्रहरी चौकीमा खबर गरेका थिए। जिल्ला प्रहरी कार्यालय र इलाका प्रहरी कार्यालय कडरबोनाबाट प्रहरी टोली घटनास्थलमा पुगेको छ र आवश्यक अनुसन्धान शुरु गरिएको छ।
प्रहरीका अनुसार घटनास्थलबाट दुईवटा गोलीका खोका फेला परेको छ। शव परीक्षणका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको छ। प्रमुख प्रहरी उपरीक्षक गौतमकुमार केसीका अनुसार सीमावर्ती क्षेत्रमा शङ्कास्पद व्यक्तिमाथि चेकजाँच तीव्र बनाइएको छ।
