- २९ बैशाख २०८३, मंगलवार / May 12, 2026
काठमाडौं । उपत्यकामा घर बनाउँदा अब ‘सेप्टिक ट्यांक’ अनिवार्य गरिएको छ । उपत्यकाका स्थानीय तहहरूका नाममा परमादेश जारी गर्दै सर्वोच्च अदालतले घर बनाउँदा ‘सेप्टिक ट्यांक’ र ‘सोक पिट’ अनिवार्य गरेको हो । सम्पूर्ण नगरपालिकाले घर तथा व्यावसायिक भवनको नक्सा पास गर्दा ‘सेप्टिक ट्यांक’ र आकाशको पानी भूमिगत जलस्रोतमा मिसिने गरी अलग्गै ‘सोक पिट’ नबनाएसम्म नक्सा पास नगर्न’ निर्देशन दिएको हो ।
१३ वर्षअघि परेको रिटमा सर्वोच्चले गरेको आदेशको हालै तयार भएको पूर्ण पाठमा यस्तो भनिएको हो । ‘घर निर्माण र तत्पश्चात् पनि बनेका संरचनाले मापदण्ड पालना गरेका छन् भन्ने विषयमा प्रभावकारी अनुगमन गर्नेरगराउने,’ पूर्णपाठमा भनिएको छ । अधिवक्ता प्रकाशमणि शर्मालगायतले २०६८ मा नदी संरक्षणमा प्रदूषण रोक्न र अनधिकृत रूपले कब्जा गरिएका किनाराका जमिन खाली गराउन सर्वोच्चले आदेश दिनुपर्ने मागका साथ दायर गरेको रिटमा सर्वोच्चले गत पुस ३ मा न्यायाधीशद्वय आनन्दमोहन भट्टराई र विनोद शर्माको इजलासले रिट जारी हुने आदेश गरेको थियो ।
त्यही आदेशको सोमबार आएको ८९ पृष्ठ लामो पूर्णपाठमा नदीहरूमा सोझै ढल मिसिने कार्यलाई रोक्न भनिएको हो । त्यसका लागि हाल निर्माणाधीन रहेका ढल प्रशोधन केन्द्रहरूको निर्माण तदारुकताका साथ सम्पन्न गरी तिनलाई सञ्चालनमा ल्याउने र ‘काठमाडौं उपत्यकाको बढ्दो सहरीकरणसमेतलाई दृष्टिगत गरी प्राविधिक रूपले आवश्यक स्थानहरूमा थप ढल प्रशोधन केन्द्रहरू निर्माण र सञ्चालन गर्नेरगराउने’ पूर्ण पाठमा उल्लेख छ ।
