- १७ असार २०८३, बुधबार / Jul 1, 2026
काठमाडौं, ३० असार । नेपाल शिक्षक महासंघले सरकारसँग भएका विगतका सहमति कार्यान्वयन नगरेको भन्दै फेरि आन्दोलनको चेतावनी दिएको छ । महासंघले विद्यालय शिक्षा विधेयकमा शिक्षक–कर्मचारीमैत्री प्रावधानहरू समावेश नगरेको भन्दै आपत्ति जनाएको छ ।
महासंघका अनुसार, ८९ दिनसम्मको आन्दोलनपछि भएको सहमति अनुसार २०८२ असार १५ भित्र विधेयक प्रतिनिधिसभाबाट पास गरिने भनिए पनि हालसम्म विधेयक संसदमा पेश नै नभएको हो । महासंघले सरकारको व्यवहारले शिक्षक–कर्मचारीको भावना बेवास्ता भएको स्पष्ट देखिएको भन्दै अब नयाँ र कडा आन्दोलन सुरु गर्नुपर्ने मोडमा पुगेको जनाएको छ । शिक्षा, स्वास्थ्य तथा सूचना प्रविधि समितिमा भइरहेको छलफलबाट सहमतिहरूलाई तोडमोड गर्न खोजिएको आरोप लगाउँदै महासंघले आम शिक्षक–कर्मचारीको मर्यादा र पेशाको सम्मान विपरीत गतिविधि भइरहेको उल्लेख गरेको छ ।
राज्य पक्ष शासकीय दम्भ र हेपाहा प्रवृत्तिमा लिप्त रहेको आरोप लगाउँदै महासंघले अब आन्दोलन अपरिहार्यजस्तै भएको बताएको छ । महासचिव तुलाबहादुर थापा र अध्यक्ष लक्ष्मीकिशोर सुवेदीद्वारा हस्ताक्षरित विज्ञप्तिमा भनिएको छ, “नेपाल शिक्षक महासंघ नयाँ र अझ कडा आन्दोलनको थालनीको मोडमा आइपुगेको छ । यस विषयमा उचित समयमा आवश्यक निर्णय लिइनेछ ।”
