- १ जेष्ठ २०८३, शुक्रबार / May 15, 2026
काठमाडौँ, ९ पुस । सुनचाँदी चोरीमा संलग्न एकजना सुनचाँदी व्यवसायीलाई नेपाल प्रहरीले पक्राउ गरेको छ।
प्रहरी वृत्त बालाजुबाट खटिएको टोलीले काठमाडौँ महानगरपालिका–१६, बालाजु बाइपासस्थित एक घरबाट सुनका गरगहना चोरी गरेको आरोपमा दोलखा भीमेश्वर नगरपालिका–७ स्थायी घर भई हाल काठमाडौँको डल्लुमा बसोबास गर्दै आएका ५४ वर्षीय विकास लकाईलाई पक्राउ गरी आज सार्वजनिक गरेको हो।
जिल्ला प्रहरी परिसर काठमाडौँका प्रवक्ता प्रहरी उपरीक्षक पवनकुमार भट्टराईका अनुसार पक्राउ परेका लकाई डल्लुस्थित सीता ज्वेलर्स का सञ्चालक रहेको अनुसन्धानबाट खुलेको छ। उनले बालाजु बाइपासको एक घरबाट सुनका गरगहना चोरी गरी अवैध रूपमा कारोबार गर्ने गरेको प्रारम्भिक अनुसन्धानमा देखिएको छ।
प्रहरीले लकाईको साथबाट सुनको नेकलेस १४ थान, सुनको लकेट ९ थान, सुनको मङ्गलसूत्र ८ थान, सुनको नौगेडी ५ थान तथा सुनको पिस लकेट ३ थान बरामद गरेको जनाएको छ।
पक्राउ परेका लकाईमाथि थप अनुसन्धान भइरहेको र घटनासँग सम्बन्धित अन्य व्यक्तिहरूको खोजी भइरहेको प्रहरीले जनाएको छ।
