- १७ भाद्र २०८३, बुधबार / Sep 2, 2026
काठमाडौँ, १७ भदाै । देशका विभिन्न भागमा भइरहेको वर्षासँगै ठूला नदीहरूमा पानीको बहाव बढेको छ । सुनकोशी, बुढीगण्डकी र महाकाली नदीमा जलसतह सतर्कता तहभन्दा माथि पुगेको छ ।
जल तथा मौसम विज्ञान विभागअन्तर्गत बाढी पूर्वानुमान महाशाखाका अनुसार बुधबार बिहान ६ बजेको मापनमा यी तीनवटै नदीमा जलसतह सतर्कता तह पार गरेको हो । सिन्धुलीको खुर्कोटस्थित सुनकोशी नदीमा जलसतह ७.६२ मिटर पुगेको छ । यहाँ ७.५ मिटरलाई सतर्कता तह मानिन्छ । पछिल्लो मापनअनुसार सुनकोशीको पानीको बहाव अहिले स्थिर रहेको छ ।
त्यस्तै, गोरखाको आरुघाटस्थित बुढीगण्डकी नदीमा जलसतह ३.६ मिटर पुगेको छ । उक्त स्थानमा ३.५ मिटरलाई सतर्कता तह मानिएको छ । बुढीगण्डकीमा भने पानीको सतह विस्तारै घट्ने क्रममा रहेको जनाइएको छ ।
डडेलधुराको पारीगाउँस्थित महाकाली नदीमा पनि जलसतह ६.३७ मिटर पुगेको छ । यहाँको सतर्कता तह ५.८ मिटर हो । महाकाली नदीको बहावसमेत अहिले स्थिर रहेको छ । नदीहरूमा पानीको सतह बढेर सतर्कता तह पार गरेपछि बाढी पूर्वानुमान महाशाखाले तल्लो तटीय क्षेत्रमा बसोबास गर्ने नागरिकलाई विशेष सावधानी अपनाउन आग्रह गरेको छ ।
वर्षा जारी रहेमा नदीको जलसतह थप बढ्न सक्ने सम्भावना रहेकाले नदी किनार तथा तल्लो तटीय क्षेत्रमा रहेका नागरिकलाई सतर्क रहन, नदी तथा खोलानाला नजिक नजान र सम्भावित जोखिमका लागि सुरक्षित स्थान पहिचान गरेर राख्न आग्रह गरिएको छ ।
