- १६ आश्विन २०८३, शुक्रबार / Oct 2, 2026
चीनले भदौ १० गतेको विनाशकारी बाढी–पहिरोबारे १२ दिनअघि नै नेपाललाई सचेत गराएको दाबी ।
विश्व मौसम विज्ञान केन्द्रमार्फत इमेलबाट पूर्वसूचना पठाइएको चीनको भनाइ ।
भारी वर्षा, भूक्षय र आकस्मिक बाढीको उच्च जोखिमबारे चेतावनी दिइएको दाबी ।
विपत्तिमा नेपाल र तिब्बतमा गरी ९५५ जनाको मृत्यु भएको उल्लेख ।
नेपालमा मात्रै ९३९ जनाको मृत्यु, तिब्बतमा १६ जनाको मृत्यु ।
३ हजार ९ सयभन्दा बढी मानिस सम्पर्कविहीन रहेको जनाइएको छ ।
चीनको दाबीबारे नेपालका सम्बन्धित निकायको आधिकारिक प्रतिक्रिया आउन बाँकी ।
काठमाडौँ, १६ भदाै । नेपालमा भदौ १० गते आएको विनाशकारी बाढी तथा पहिरोबारे चीनले विपत्ति आउनुभन्दा १२ दिनअघि नै नेपाललाई पूर्वसूचना दिएको दाबी गरेको छ ।
प्राकृतिक विपत्तिका बेला आवश्यक तथ्याङ्क तथा पूर्वसूचना उपलब्ध नगराएको भन्दै चीनको आलोचना भइरहेका बेला बेइजिङले आफ्नो बचाउमा यस्तो दाबी गरेको हो ।
चीनका अनुसार उसको विश्व मौसम विज्ञान केन्द्रले विपत्ति आउनुभन्दा १२ दिनअघि नै नेपाललाई इमेलमार्फत सम्भावित प्राकृतिक जोखिमबारे जानकारी गराएको थियो । उक्त इमेलमा नेपालमा भारी वर्षा हुने, भूक्षयको जोखिम बढ्ने तथा आकस्मिक बाढी आउन सक्ने सम्भावनाबारे सचेत गराइएको चीनको दाबी छ ।
चीनले सम्भावित जोखिमबारे समयमै प्राविधिक सूचना उपलब्ध गराएको भन्दै आफूले सूचना लुकाएको आरोपको खण्डन गरेको छ ।यसैबीच, पछिल्लो तथ्याङ्कअनुसार बाढी तथा पहिरोका कारण नेपाल र तिब्बतमा गरी ९५५ जनाको मृत्यु भएको उल्लेख गरिएको छ ।
नेपालमा मात्रै मृत्यु हुनेको सङ्ख्या ९३९ पुगेको छ भने तिब्बतमा १६ जनाको मृत्यु भएको जनाइएको छ । विपत्तिपछि अझै ३ हजार ९ सयभन्दा बढी मानिस सम्पर्कविहीन रहेको बताइएको छ । बेपत्ताको खोजी तथा उद्धार जारी रहेकाले मृतकको सङ्ख्या अझै बढ्न सक्ने आशङ्का गरिएको छ ।
भारतीय सञ्चारमाध्यम दैनिक भास्करमा प्रकाशित विवरणअनुसार चीनले नेपाललाई समयमै प्राविधिक सूचना उपलब्ध गराएको दाबी गरेको हो । यद्यपि, चीनले पठाएको भनिएको उक्त पूर्वसूचना र इमेलबारे नेपालका सम्बन्धित निकायबाट आधिकारिक प्रतिक्रिया आउन बाँकी छ ।
