- ३१ भाद्र २०८३, बुधबार / Sep 16, 2026
सुनसरी । सुनसरीको भोक्राहा नरसिंह गाउँपालिका–३, जलुवाटोलस्थित पूर्व–पश्चिम राजमार्गमा बिहान भएको बस र माइक्रोबस दुर्घटनामा ३ जनाको मृत्यु भएको छ । उक्त दुर्घटनामा १५ जना घाइते भएका छन् ।
प्रहरीका अनुसार काँकडभिट्टाबाट दिक्तेलतर्फ जाँदै गरेको मे १ ख १७९९ नम्बरको बस र विपरीत दिशाबाट आइरहेको प्रदेश २–०१–००१ ज ००४७ नम्बरको माइक्रोबस आपसमा ठोक्किँदा दुर्घटना भएको हो ।
सुनसरी जिल्ला प्रहरी कार्यालयका प्रवक्ता डीएसपी योगराज खतिवडाका अनुसार मृतकहरूको पहिचान अझै खुल्न बाँकी छ । घाइतेहरूलाई इनरुवा अस्पताल, विराटनगर न्यूरो अस्पताल र नोबेल मेडिकल कलेजमा उपचार भइरहेको छ ।
बस चालक झापा, अर्जुनधारा नगरपालिका–१ निवासी गोपाल अधिकारीलाई प्रहरीले नियन्त्रणमा लिएको छ र घटनाबारे थप अनुसन्धान भइरहेको छ ।
