- २६ असार २०८३, शुक्रबार / Jul 10, 2026
काठमाडौं, २६ असार । सर्वोच्च अदालतका पूर्वन्यायाधीशको नेतृत्वमा गठन गरिएको सम्पत्ति छानबिन आयोगको वैधानिकतामाथि प्रश्न उठाउँदै दायर रिटमाथि शुक्रबार सर्वोच्च अदालतमा सुनुवाइ भइरहेको छ।
अधिवक्ता प्रेमराज सिलवालले १५ र २९ वैशाखमा दायर गरेका दुई रिट निवेदनमाथि यसअघि सुनुवाइ नसकिएपछि मुद्दालाई ‘हेर्दाहेर्दै’मा राखिएको थियो। सोही रिटमाथि आज पुनः सुनुवाइ अघि बढाइएको हो।
रिट निवेदनमा सरकारले गठन गरेको आयोग अख्तियार दुरुपयोग अनुसन्धान आयोगको संवैधानिक क्षेत्राधिकारसँग बाझिने तथा शाही आयोगसम्बन्धी सर्वोच्च अदालतको अघिल्लो फैसलाको मर्मविपरीत रहेको दाबी गरिएको छ।
सरकारले गत वैशाख ३ गते २०६२/६३ सालदेखि हालसम्म सार्वजनिक पद धारण गरेका प्रमुख राजनीतिक पदाधिकारी तथा उच्चपदस्थ कर्मचारीहरूको सम्पत्ति छानबिन गर्न पाँच सदस्यीय आयोग गठन गरेको थियो।
उक्त आयोगको संयोजकमा सर्वोच्च अदालतका पूर्वन्यायाधीश राजेन्द्रकुमार भण्डारी रहेका छन्। आयोगलाई २०६२ सालयतिका उच्च पदाधिकारीहरूको सम्पत्ति छानबिन गर्ने कार्यादेश दिइएको छ।
सर्वोच्च अदालतको निर्णयले आयोगको वैधानिकता र आगामी कार्यप्रक्रियामा महत्वपूर्ण प्रभाव पार्ने अपेक्षा गरिएको छ।
