- २९ श्रावण २०८३, शुक्रबार / Aug 14, 2026
सूर्यविनायक, ८ जेठ भक्तपुर । सूर्यविनायक नगरपालिकाले सामुदायिक विद्यालयहरूमा शिक्षण सिकाइको गुणस्तर अभिवृद्धिका लागि कक्षा कोठा तहसम्मको सुसूक्ष्म अध्ययन सुरू गरेको छ। यस कार्यका लागि शिक्षाविद्हरू सम्मिलित एक विज्ञ अनुगमन टोली गठन गरी विद्यालय अनुगमनको जिम्मेवारी दिइएको छ।
उक्त टोलीमा रहेका शिक्षाविद्हरूले दुई–दुई जनाको समूहमा विद्यालयको कक्षा कोठासम्म पुगेर शिक्षकहरूको सिकाइ शैली, पाठ्यक्रम प्रयोग, तथा विद्यार्थीहरूको सिकाइ स्थिति बारे गहिरो अवलोकन गर्ने नगरपालिका प्रवक्ता रविन्द्र सापकोटाले जानकारी दिनुभयाे ।
सापकोटाले जानकारी गराएअनुसार, “यो पहलले सिकाइ क्रियाकलापलाई अझ प्रभावकारी बनाउने र शिक्षकहरूको पठनपाठन कार्यप्रति जिम्मेवारिता अभिवृद्धि गराउने अपेक्षा गरिएको छ। पाठ्यक्रममा आधारित सिकाइ पद्धतिमार्फत विद्यार्थीहरूको शैक्षिक उपलब्धिमा सुधार आउने विश्वास लिएको छ।”
नगरपालिकाले अध्ययनपछि प्राप्त सुझावहरू सम्बन्धित शिक्षक, विद्यालय प्रशासन तथा नीतिगत तहमा प्रस्तुत गरी आवश्यक सुधारका उपाय अपनाउने तयारीसमेत गरेको जनाएको छ।
