- २७ बैशाख २०८३, आईतवार / May 10, 2026
भक्तपुर । सुर्यविनायक नगरपालिका पूर्ण खोप सुनिश्चितता र दिगोपना घोषणा कार्यक्रम सम्पन्न भएको छ । आज सुर्यविनायक नगरपालिका स्वाश्थ्य शाखाद्धारा आयोेजित पूर्ण खोप सुनिश्चितता र दिगोपना घोषणा कार्यक्रमका बिच सुर्यविनायक वडा नं ७ का वडाध्यक्ष रविन्द्र सापकोटाले २०७४ सालबाट सुर्यविनायक नगरलाई पूर्ण खोप सुनिश्चित नगर घोषणा गरेको जानकारी गराएका हुन् । उनले सुर्यविनायक नगरलाई २०८३ सालसम्म बालमैत्री नगर बनाउने योजना लिएको पनि बताए ।
सुर्यविनायक नगरपालिकाले जनसाङख्यिक सर्वेक्षण गरी नगरबासीलाई थप सुविधा उपलब्ध गराउने उनले जानकारी दिए । साथै नगरपालिकाले आफै स्वास्थ्य प्रोफाइल बनाएर स्वास्थ्य शाखाको कार्यलाई सहज बनाउने सापकोटाको भनाइ छ । “हाम्रो भौगोलिक बनावटका कारण काम गरे जतिको जस नपाउने अवस्था छ । अगामी दिनमा काम गरेको जति जस पाउने हिसाबले योजना बनाएर अघि बढ्ने छौ ।” उनले भने, “स्वास्थ्य शाखाकै मागअनुरुप हामीले सबै स्वास्थ्य कार्यालयलाई ल्याबटप पनि उपलब्ध गराएका छौ । यो वर्ष गुन्डु स्वास्थ्य चौकीलाई डिजिटल प्रविधिबाट अनलाइन प्रणालीमा पनि लगेका छौ र आगामी वर्षबाट सबै स्वास्थ्य संस्थालाई अनलाइन प्रणालीमा लग्ने योजना बनाएका छौ । जसले पूर्ण खोप अभियानलाई थप सहज बनाउने छ ।”
खोप कार्यक्रम देशव्यापी कार्यक्रम रहेकाले खोप कतिले लगाए भन्दा पनि घरधुरी सर्वेक्षण धेरै महत्वपूर्ण रहेको जिल्ला जनस्वास्थ्य कार्यालयकी प्रमुख अस्मिता ओझाले बताइन् । ग्रामीण क्षेत्रमा भन्दा सहरी क्षेत्रमा जनघनत्व बढी हुने भएकाले सहरी क्षेत्रका बालबालिकाले खोप लगाए नलगाएको विषयमा संवेदनशील बन्न उनले सुझाव दिएकी छन् । साथै सहरका अभिभावकहरु दिउँसोको समयमा कार्यव्यस्तताका कारण बालबालिकालाई खोप लगाउन नभ्याउने भएकाले खोप लगाउने समय पनि बिहान र बेलुका राख्दा सहज हुने प्रमुख ओझाले बताइन् ।
