- १६ जेष्ठ २०८३, शनिबार / May 30, 2026
भक्तपुर । भक्तपुरको सुर्यविनायक नगरपालिकालाई सबल र विकसित बनाउनका लागि भौतिक पूर्वाधारको विकास र मानवीय विकासमा जोड दिइएको छ । भौतिक पूर्वाधारको विकास सँगसँगै मानवको पनि विकास गर्नुपर्छ भनेर सुर्यविनायक नगरपालिकाले विभिन्न योजनाहरु तयार गरेको नगर उपप्रमुख सरिता तिमलसिना भट्टराईले बताइन् ।
सुर्यविनायक नगरपालिकाले दिर्घकालीन सोचमा ‘दिगो विकास व्यवस्थित सहर,स्वच्छ समृद्ध सुर्यविनायक नगर’ भनेर आवधिक योजना पनि तयार गरेको उपप्रमुख भट्टरार्ईले जानकारी दिइन् । अबको २० वर्षमा सुर्यविनायक नगरलाई कसरी विकास गर्ने भनेर पनि आवधिक योजनामा तयार गरिसकेको उनले बताइन् । ”हामीले २०७९ साल पश्चात् विशेष गरेर स्वास्थ्य र शिक्षा क्षेत्रलाई अलि बढी जोड दिएका छौ । साथै ग्रामीण भेगको बाटो निर्माणमा पनि जोड दिइएको छ । खासगरी काक्राबारी,चित्तपोल,अन्नतलिङ्गेश्वरका बाटोहरुलाई यो पटक अलि केन्द्रित गरेका छौ ।“ उनले बताइन् ।
शिक्षातर्फ हरेक विघालयमा भौतिक पूर्वाधार पुर्याएको उपप्रमुख भट्टरार्ईको भनाइ छ । उनका अनुसार विद्यार्थीको सङख्या पनि बढ्दो क्रममा रहेको छ । “ यो वर्ष एसईईमा पनि ८५ प्रतिशत नतिजा उत्तीर्ण आएको छ । शिक्षकहरुमा पनि सुर्यविनायक नगरपालिकाले पहिलो पटक कार्य सम्पादन मुल्याङकनको आधारमा प्रअ नियुक्ति गरेको छ । विद्यार्थीहरुका लागि पनि सिक्दै पढ्दै भनेर सीपमूलक तालिम पनि ल्याएका छौं । अबको बजेटमा पढ्दै कमाउदै योजनामा पनि हामी काम गर्नेछौ ।”
सुर्यविनायक नगरपालिकाका वरिष्ठ इन्जिनियर जनक न्यौपानेका अनुसार मेलम्चीको पानी प्रथम चरणमा नगरका १ देखि ६ सम्मका वडामा वितरण गर्ने तयारी भइरहेको छ । योजनाको डिपिआर भई आठ करोडको ठेक्काबाट ८० प्रतिशत कार्य सम्पन्न भइसकेको उनले जानकारी दिए । “प्रथम चरणको काम सकिएपछि सुरुमा सुवर्णश्वरको ट्याङकीमा पानी वितरण गर्छौ । त्यसपछि घट्टेखोला, दधिकोट वृहत, बालकोट, सिरुटार हुँदै पानी वितरण गरिनेछ । उनले भने ,हामीले उपभोक्ता समिति र नगरपालिकाको लागत साझेदारीमा यो योेजना बनाइएको छ । नगरपालिका र काठमाडौं उपत्यका खानेपानी लिमिटेडबिच भएको समझदारी पत्रअनुसार केयुकेएलले प्रतिदिन २० लाख लिटर पानी दिने छ र त्यही पानी हरेक उपभोक्ता समितिलाई बाँड्ने योजना बनाएका छौ । ”
