- २५ फाल्गुन २०८२, सोमबार / Mar 9, 2026
सिन्धुली, ५ माघ , २०८२ । सिन्धुलीको कमलामाई नगरपालिका–४ धुराफाँटकी ३२ वर्षीया सुशीला बम्जनलाई पेट्रोल छर्की आगो लगाएर हत्या गरिएको घटनामा संलग्न सासू र नन्दलाई पुर्पक्षका लागि थुनामा पठाउन अदालतले आदेश दिएको छ ।
सिन्धुली जिल्ला अदालतका जिल्ला न्यायाधीश गेहेन्द्रराज पन्तको इजलासले हत्या अभियोग लागेकी सुशीलाकी सासू मायाँरानी बम्जन र नन्द मीना लामालाई पुर्पक्षका लागि थुनामा राख्न आदेश दिएको हो । अदालतका श्रेस्तेदार चित्रखर अधिकारीका अनुसार आइतबार दुवै जनालाई सिन्धुली कारागार पठाइएको छ ।
गत पुस ६ गते आफ्नै घरमा सुशीलामाथि पेट्रोल छर्की आगो लगाएर हत्या गरेको आरोपमा मायाँरानी बम्जन र मीना लामालाई प्रहरीले सोही दिन पक्राउ गरेको थियो । अनुसन्धान पूरा भएपछि प्रहरीले माघ २ गते दुवै जनालाई अदालतमा पेस गरेको थियो ।
यस घटनामा संलग्न अर्का अभियुक्त ससुरा दुर्गामान बम्जन भने हाल कीर्तिपुरस्थित बर्न अस्पतालमा उपचाररत रहेकाले पक्राउ गर्न नसकिएको जिल्ला प्रहरी कार्यालय सिन्धुलीले जनाएको छ । मुख्य योजनाकार भनिएका सुशीलाका श्रीमान् सूर्यबहादुर बम्जन हाल कोरियामा रहेकाले उनी नेपाल नआएको प्रहरीले जनाएको छ ।
दुर्गामान बम्जन र सूर्यबहादुर बम्जन दुवै जनाविरुद्ध पक्राउ पुर्जी जारी गरिएको छ । प्रहरीले प्रारम्भिक बयान , घटनास्थलको अवस्था र संकलित प्रमाणका आधारमा अभियुक्तहरूविरुद्ध कर्तव्य ज्यानसम्बन्धी कसुरमा मुद्दा दर्ता गरी अनुसन्धान अघि बढाएको छ ।
घटनापछि मृतक सुशीलाको न्यायको माग गर्दै पीडित परिवार र स्थानीयवासीले निष्पक्ष छानबिन र दोषीलाई कडा कारबाहीको माग गर्दै आएका छन् ।
