- २२ फाल्गुन २०८२, शुक्रबार / Mar 6, 2026
काठमाडौं, २० फागुन । बूढानीलकण्ठ नगरपालिका–२ मा फेला परेको शंकास्पद वस्तु नेपाली सेनाको टोलीले निस्क्रिय पारेको छ । स्थानीय क्षेत्रमा त्रास सिर्जना भएपछि सुरक्षाकर्मी परिचालन गरिएको थियो ।
तल्लो भंगालस्थित मसला उद्योगदेखि चुनखेलतर्फ जाने सडक पेटीमा सेतो कागजले बेरिएको प्रेसर कुकर फेला परेको थियो । बूढानीलकण्ठ शंकास्पद वस्तुबारे सूचना प्राप्त भएपछि चन्दननाथ गणबाट खटिएको सेनाको टोली घटनास्थल पुगेको हो ।
उक्त वस्तु मंगलबार राति करिब १२ बजे देखिएको बताइएको छ । बिहान करिब ७ बजे सेनाको टोलीले आवश्यक सतर्कता अपनाउँदै प्रेसर कुकर निस्क्रिय पारेको जनाएको छ ।
निस्क्रिय बनाइएपछि कुकरभित्र सलाइको काँटी र इट्टाको टुक्रा फेला परेको सेनाले जानकारी दिएको छ । घटनाबारे थप अनुसन्धान भइरहेको सुरक्षा स्रोतले जनाएको छ ।
