- १२ बैशाख २०८३, शनिबार / Apr 25, 2026
सिरहा, २० फागुन । प्रतिनिधिसभा निर्वाचनको पूर्वसन्ध्यामा सिरहा क्षेत्र नं. ३ का जनता समाजवादी पार्टी (जसपा) नेपालका उम्मेदवार अशेश्वर यादव पक्राउ परेका छन् । मौन अवधिका बेला नगदसहित फेला परेपछि उनलाई नियन्त्रणमा लिइएको प्रहरीले जनाएको छ ।
प्रहरीका अनुसार नेपाल–भारत सीमास्थित माडरबाट सिरहा सदरमुकामतर्फ आउँदै गरेको प्र. २–०२–००१ च ०८७ नम्बरको स्कारपियो गाडीलाई राति करिब १२:३० बजे शिवचोकमा संयुक्त सुरक्षा जाँचका क्रममा रोकिएको थियो । जाँचका क्रममा गाडीबाट ४ लाख ८७ हजार रुपैयाँ नगद बरामद भएको र त्यसपछि अशेश्वर यादव पक्राउ गरिएको स्रोतले जनाएको छ ।
प्रहरीले गाडीबाट मतपत्रसमेत फेला परेको दाबी गरेको छ । घटनापछि उम्मेदवार यादवसहित पाँच जनालाई नियन्त्रणमा लिइएको छ ।
नियन्त्रणमा लिइएका सबैलाई जिल्ला प्रहरी कार्यालय सिरहामा राखिएको छ । थप कानुनी प्रक्रिया अघि बढाउन मुख्य निर्वाचन अधिकृतको कार्यालयमा पठाउने तयारी भइरहेको प्रहरी स्रोतले जानकारी दिएको छ ।
यसअघि नेपाल कम्युनिस्ट पार्टी (नेकपा)का तर्फबाट पर्सा क्षेत्र नं. २ का उम्मेदवार मनोज चौधरी पनि पक्राउ परेका थिए । निर्वाचनको मुखैमा भएका यी घटनाले राजनीतिक वृत्तमा चासो बढाएको छ ।
