काठमाडाैं, १७ मङ्सिर । अपाङ्गता भएका व्यक्तिहरूको ३४ औँ अन्तर्राष्ट्रिय दिवसका अवसरमा आज स्वदेश तथा विदेशमा रहेका सम्पूर्ण दिदीबहिनी तथा दाजुभाइको सुख, शान्ति, समृद्धि र सुस्वास्थ्यको कामना गर्दै उनले शिक्षा, स्वास्थ्य र रोजगारीको अवसरबाट वञ्चित अपाङ्गता भएका व्यक्तिहरूको पहिचान गरी राज्यबाट प्रदान गरिने सबै सुविधा र अवसरमा समान पहुँच स्थापित गर्न जरुरी भएको बताए ।

सन्देश मार्फत उनले भनेका छन्, “नेपालको संविधानले अपाङ्गता भएका नागरिकलाई विविधताको पहिचानसहित मर्यादा र आत्मसम्मानपूर्वक जीवनयापन गर्न पाउने र सार्वजनिक सेवा तथा सुविधामा समान पहुँचको हक सुनिश्चित गरेको छ, संविधानले समानुपातिक, समावेशी र सहभागितामूलक सिद्धान्तका आधारमा समान, समृद्ध र न्यायपूर्ण समाजको निर्माण गर्ने अपेक्षा गरेको छ, अपाङ्गताका आधारमा गरिने सबै प्रकारका विभेदलाई निषेध गर्दै उहाँहरूलाई समान तथा अर्थपूर्ण रूपमा मानवीय सहभागिता गराउने मनसाय संविधानले लिएको छ ।”

अपाङ्गता भएका व्यक्तिहरूलाई कार्यालय, विद्यालय, सार्वजनिक सवारी, सडक, पार्क, मठमन्दिर, सरकारी र सार्वजनिक एवं निजी संरचना आदिमा उनीहरूको आवश्यकताअनुसारको मैत्रीपूर्ण भौतिक संरचना तथा अन्य आवश्यक वातावरण तयार गरी आवश्यक सुविधा उपलब्ध गराउनु आजको आवश्यकता रहेको राष्ट्रपति पौडेलको भनाइ छ ।

उनले भने, “अपाङ्गता भएका व्यक्तिहरूप्रति समाजमा रहेका नकारात्मक भावनामा परिवर्तन ल्याइ समावेशिता, समानता, मानवअधिकार पहुँचयोग्य वातावरण एवं भेदभावविहीन समाजको निर्माण गर्दै अपाङ्गता भएका व्यक्तिहरूको न्यायपूर्ण सहभागिता सुनिश्चित गर्न सरकार, परिवार, समाज तथा सङ्घ संस्थाहरूको एकल र सामूहिक भूमिका अभिवृद्धिमा यस दिवसले थप बल पुर्‍याउने मैले विश्वास लिएको छु ।”

अपाङ्गता भएका नागरिकहरूको हक अधिकार प्रवर्द्धनका लागि संयुक्त राष्ट्रसङ्घको पहलमा सन् १९९२ देखि हरेक वर्ष डिसेम्बर ३ तारिखका दिन विश्वभर अपाङ्गता भएका व्यक्तिहरूको अन्तर्राष्ट्रिय दिवस मनाउन थालिएको हो । यस वर्ष ‘अपाङ्गता समावेशी समाजको प्रवर्द्धन: सामाजिक उन्नतिको संवर्द्धन’ भन्ने राष्ट्रिय नाराका साथ नेपालमा विभिन्न कार्यक्रमहरू आयोजना गरी यो दिवस मनाइँदै छ । रासस

काठमाडौं, १७ मंसिर । अपाङ्गता भएका व्यक्तिहरूको ३४औं अन्तर्राष्ट्रिय दिवस आज नेपालभर विभिन्न कार्यक्रमका साथ मनाइँदैछ । सरकारी निकाय, सरोकारवाला संस्था तथा अपाङ्गता क्षेत्रमा सक्रिय संघ–संस्थाले विविध जनचेतनामूलक कार्यक्रमको आयोजना गरेका छन् ।

दिवसको अवसरमा राष्ट्रपति, उपराष्ट्रपति, प्रधानमन्त्री तथा प्रमुख राजनीतिक दलका नेताहरूले शुभकामना सन्देश जारी गरेका छन् । संयुक्त राष्ट्रसंघले सन १९९२ देखि हरेक डिसेम्बर ३ का दिन अपाङ्गता भएका व्यक्तिहरूको अधिकार, समानता र समावेशिता प्रवर्द्धन गर्ने उद्देश्यले यो दिवस मनाउन सुरु गरेको हो ।

यस वर्षको नारा ‘अपाङ्गता समावेशी समाजको प्रवर्द्धनः सामाजिक उन्नतिको संवर्द्धन’ निर्धारण गरिएको छ । दिवसले समाजका सबै क्षेत्रमा अपाङ्गता भएका व्यक्तिहरूको हक, समान पहुँच, सम्मान र अवसर सुनिश्चिततासम्बन्धी सामूहिक प्रतिवद्धता पुनः स्मरण गराएको छ ।

कार्यालय, विद्यालय, सार्वजनिक यातायात, सडक, पार्क, मठ–मन्दिर तथा निजी–सार्वजनिक संरचनामा मैत्रीपूर्ण भौतिक पहुँच र आवश्यक सुविधा सुनिश्चित गर्नुपर्ने माग निरन्तर उठ्दै आएको छ ।

नेपालको संविधानले अपाङ्गता भएका नागरिकलाई मर्यादापूर्ण जीवन र समान सार्वजनिक सेवा पहुँचको हक प्रत्याभूत गरे पनि व्यवहारमा पूर्ण कार्यान्वयन हुनुपर्ने आवाज अझै सशक्त रूपमा उठिरहेकै छ ।