काठमाडौं, ११ साउन । सुनसरीको देवानगञ्ज गाउँपालिका–३ कप्तानगञ्जमा भएको सामुदायिक झडपपछि गृह मन्त्रालयले प्रमुख जिल्ला अधिकारी (सीडीओ) सहित सुरक्षा निकायका प्रमुखहरूको हेरफेर गरेको छ ।
मन्त्रालयले सुनसरीका प्रमुख जिल्ला अधिकारी बासुदेव घिमिरेलाई फिर्ता बोलाएर उनको स्थानमा संखुवासभाका प्रमुख जिल्ला अधिकारी ईश्वरीप्रसाद अर्याललाई पठाउने निर्णय गरेको छ ।
त्यसैगरी, कोशी प्रदेश प्रहरी कार्यालयका डीआईजी विनोद घिमिरेलाई प्रहरी प्रधान कार्यालय फिर्ता बोलाइएको छ । उनको स्थानमा डीआईजी शेखर खनाललाई खटाइने निर्णय भएको छ ।
जिल्ला प्रहरी कार्यालय सुनसरीका प्रहरी उपरीक्षक (एसपी) केशव थेबेलाई गौतमबुद्ध अन्तर्राष्ट्रिय विमानस्थल, भैरहवा सरुवा गरिएको छ भने विमानस्थलमा कार्यरत एसपी पुष्पराज मल्ललाई सुनसरी पठाइएको छ ।
यस्तै, सशस्त्र प्रहरी बलको कप्तानगञ्जस्थित युनिटमा कार्यरत डीएसपी नन्दकिशोर महतोलाई फिर्ता बोलाएर उनको स्थानमा डीएसपी मदननाथलाई खटाइएको छ । देवानगञ्जको कप्तानगञ्ज क्षेत्रमा हिन्दु र मुस्लिम समुदायबीच भएको झडपका क्रममा सुरक्षाकर्मीको गोली लागेर ओमप्रकाश मेहताको मृत्यु भएको थियो ।
घटनामा ९ जना सर्वसाधारण, १० जना नेपाल प्रहरी र १० जना सशस्त्र प्रहरी गरी २९ जना घाइते भएका छन् ।गृह मन्त्रालयले घटनाको सत्यतथ्य छानबिन गर्न सहसचिवको नेतृत्वमा समिति गठन गरिसकेको छ । प्रारम्भिक विवरणअनुसार धार्मिक झण्डा हटाएर अर्को झण्डा राखिएको तथा मन्दिर क्षेत्रमा ठूलो आवाजमा डिजे बजाइएका विषयलाई लिएर विवाद चर्किएको बताइएको छ ।
घटनापछि थप तनाव फैलिन नदिन जिल्ला प्रशासन कार्यालयले देवानगञ्ज र हरिनगर गाउँपालिकाका केही क्षेत्रमा निषेध आदेश जारी गरेको छ ।
