काठमाडौँ, १७ साउन । काठमाडौँको बूढानीलकण्ठ क्षेत्रमा प्रहरीले गोली प्रहार गरी कर्मा तामाङलाई पक्राउ गरेको छ ।जिल्ला प्रहरी परिसर काठमाडौँका एसपी दानबहादुर थापाका अनुसार गए राति करिब १०:२५ बजे पक्राउ गर्ने क्रममा तामाङले साथमा रहेको खुकुरी प्रयोग गरी प्रहरीमाथि आक्रमण गर्ने प्रयास गरेपछि प्रहरीले तीन राउन्ड गोली प्रहार गरेको हो ।

प्रहरीका अनुसार तामाङ चोरी तथा लुटपाटका घटनामा संलग्न रहेको आरोपमा खोजी सूचीमा थिए । नियन्त्रणमा लिने क्रममा प्रतिरोध गरेपछि गोली चलाउनुपरेको प्रहरीको भनाइ छ ।

प्रहरीले गोली प्रहारपछि तामाङलाई नियन्त्रणमा लिएर थप अनुसन्धान अघि बढाएको जनाएको छ । प्रहरीका अनुसार तामाङ कैद भुक्तानका क्रममा रहेका बेला जेनजी आन्दोलनका क्रममा फरार भएका व्यक्ति हुन् । घटनाबारे थप अनुसन्धान भइरहेको प्रहरीले जनाएको छ ।

काठमाडौँ, १५ कात्तिक। हरिबोधिनी एकादशीका अवसरमा देशभरका विभिन्न नारायण मन्दिरहरूमा आज बिहानैदेखि भक्तजनको घुइँचो लागेको छ। राजधानी उपत्यकासहित देशका अन्य धार्मिक स्थलहरूमा विशेष मेला लागेको हाम्रा स्थानीय संवाददाताले जनाएका छन्।

काठमाडौँ उपत्यकाका चार नारायणस्थान-चाँगुनारायण (भक्तपुर), विशङ्खुनारायण (ललितपुर), शेषनारायण र इचङ्गुनारायण (काठमाडौँ) मा बिहानैदेखि दर्शनार्थीको बाक्लो भीड लागेको छ। उपत्यकाभित्रका साना–ठूला नारायण मन्दिरहरूमा पनि पूजाआजाको चहलपहल बढेको छ।

त्यसैगरी नागार्जुन नगरपालिका–७ रामकोटस्थित बद्रीनारायण धाम र तनहुँको व्यास नगरपालिका–९ मा रहेको सिद्धेश्वर राजापानी महादेव मन्दिरमा पनि एकादशी मेला लागेको छ। उपत्यकाका चार नारायणस्थानमा पुग्न नसक्ने भक्तहरूले बूढानीलकण्ठ नारायणस्थान र नारायणहिटीस्थित चातुव्र्युह नारायण मन्दिरमा दर्शन गर्ने गर्छन्।

ती दुवै मन्दिरमा शेषशायी भगवान् नारायण विराजमान छन्, जसको दर्शनले चारै नारायण मन्दिरको दर्शन गरे बराबर फल प्राप्त हुने जनविश्वास छ। बूढानीलकण्ठको नारायणस्थानमा ठूलो ढुङ्गामा निर्मित हर–हरि भगवान्को मूर्तिलाई विश्वकै अद्वितीय शिल्प मानिन्छ। यहाँ प्रत्येक वर्ष हरिबोधिनी एकादशीका अवसरमा देश–विदेशका भक्तजनको घुइँचो लाग्ने गर्दछ। मन्दिर व्यवस्थापन समितिका अनुसार आजदेखि कार्तिक शुक्ल पूर्णिमासम्म विशेष मेला लाग्नेछ।

यसैगरी, दक्षिणकालीको शेषनारायण मन्दिरमा पनि दर्शनार्थीको भीड व्यवस्थापनका लागि विशेष तयारी गरिएको छ। प्रत्येक वर्ष कार्तिक शुक्ल एकादशीका दिन भगवान् विष्णुको प्रतीकका रूपमा तुलसी र दामोदर (विष्णु) को विवाह गरी हरिबोधिनी एकादशी पर्व मनाइन्छ।

आषाढ शुक्ल एकादशी अर्थात् हरि शयनी एकादशीका दिन विष्णु क्षीरसागरमा शयन गर्न जाने र आजको दिन उठ्ने धार्मिक मान्यता रहेको छ। त्यसैले यो दिनलाई हरिबोधिनी एकादशी भनिन्छ।